黃柏高（Paco）早前曾傳出患重病，一度隱居養病，昨日他現身荃灣為監製電影《地下拳》宣傳時精神奕奕，並坦承去年曾患病做手術，幸好接受治理後大步檻過，而從前最愛杯中物的Paco，亦悟出健康真理，戒酒養生。
「好彩好快發現」
Paco受訪時說：「好返好多，多謝上天，非常難得。個病係嚴重嘅，好彩好快發現，又有個好醫生幫我做手術，𠵱家恢復返。」Paco以前無酒不歡，他坦言今次患病和飲酒太多有關，但並非與肝臟相關的疾病：「總之身體健康係第一位， 𠵱家酒要暫停，對我嚟講係最大懲罰，都戒咗近一年，上年7月到𠵱家。」他亦呼籲大家不要喝太多酒，但未肯透露更多詳情。Paco笑言：「現時係重新適應，大家都知我最鍾意飲酒，不過年紀大要煞停，無謂挑戰自己。」至於經治療後是否完全康復？他說：「我唔敢咁大膽講，大步檻過啦。」他指今次是不幸中之大幸，因為武漢肺炎疫情工作停頓，讓他有更多時間靜心休養。
李璨琛無意再生
同場的李璨琛，其太太梁志瑩經常於網上晒愛女李元元的得意相，被網民指她把囡囡當搖錢樹，他表示：「唔回應喇。」不過談及愛女，李璨琛即變慈父，透露間中會和囡囡拍照：「佢都有啲我哋嘅DNA，唔算刻意擺甫士嘅，佢自己覺得好得意，小朋友學嘢真係好快。」又表示暫時無意再生小朋友。
提到有份監製、原定今年新年上映的電影《大盜演》，受疫情影響延期，李璨琛說：「𠵱家覺得冇上係塞翁失馬，因為嗰時個個都出唔到街，趁呢個時間做吓後期先，冇諗票房，呢個唔係我第一樣擔心嘅嘢。」
採訪：盧妹
攝影：林賓尼