心理學家組成的傘後組織「良心理政」成員、臨床心理學家葉劍青觀察發現，抗暴運動引發情緒問題而需求助的人士當中，逾六成是30歲以下，年紀最小亦只得13、14歲，最嚴重有尋死想法。港人患上創傷後遺症初期主因是警暴，後來慢慢因無力感重，引發更多負面情緒問題。他預料港人未來對情緒支援需求非常大，而人與人之間的信任也將會陷入低潮。
抗爭降溫 求助個案反升
葉劍青在運動期間擺街站、開設情緒服務熱線，為有需要人土情緒輔導，「良心理政係頭個半年，收到好多求助個案，每個月收到約百宗求助個案，累積冇一千都幾百人」。一些求助者被衝突和警暴場面「嚇親」，腦中重複相關畫面，引發驚慌、驚惶失措等情緒，甚至失眠，影響日常生活，「尤其去年11月發生中大（保衞戰）同理大（圍城），之後兩個月求助係高峯」。
但隨年初本港爆發武漢肺炎，「（求助）的確個數字係少咗，疫症都係好緊要嘅嘢」，但來求助的人多是無力感重、情緒抑鬱和感覺找不到出路，「今年開始求助個案，出現喺情緒方面問題，多過純係創傷後壓力症」。他解釋，一些在意運動發展的求助者認為，這段時間港人爭取五大訴求和運動進展停滯不前，「（香港人）淨係關心口罩係咪足夠，使唔使隔離，係咪已經淡忘咗件事，覺得冇人關心，淨係得佢自己仲係咁憂傷」，因此部份人的情緒問題惡化。
他續說：「創傷後壓力症或其他抑鬱症，由負面情緒影響嘅情緒病，唔係一朝一夕發出嚟，有時可能會潛伏到某個關口，生活上會遇到一啲困境，又會再爆發出嚟。」今年3、4月運動已大幅降溫，但求助個案卻逐漸回升，「我嘅睇法係有人啲覺得自己頂得順，但去到疫情再加埋其他唔如意嘅事，例如收入減少、同家人衝突，所以爆發又再慢慢高啲」。
在他的觀察中，逾六成求助者為30歲以下，當中大學生、中學生比例佔一半，年紀最小也不過13、14歲。「唔好以為13、14歲唔理解，社會爭取緊乜訴求，佢哋都理解同答到」。最令他擔心的是，有求助者「跌入咗無助無望嘅感受，有想尋死諗法」，須找社工長期跟進。求助者最嚴重情況會出現自殘、自殺傾向，比例佔整體約八分之一，「有啲嚴重到日日唔想起身，直情唔想自己喺呢個世界，呢啲會轉介畀私人嘅心理學家、精神科醫生跟進」。
全城氣氛差社會或崩潰
「當社會上大部份人情緒唔健康，唔單只引發社會衝突，社會好多問題都會影響，就算普通生活同工作上運作，我哋都需要一個基本嘅精神健康狀態應付。」葉劍青說，社會是一環扣一環，試想想每個人都帶着負面情緒，不能應付問題，「社會咪會崩潰？我擔心幾年後氣氛會更加差」，即使人與人之間信任亦存疑。他指出，港人因反送中運動承受精神健康問題比雨傘運動嚴重好幾倍，預料港人未來幾年對情緒支援服務需要大，以現時本港提供的心理服務支援絕不能應付。「精神科醫生、心理學家私人都好貴，中產或以上先負擔得到。而且療癒效果唔係見一至兩次，講緊嚴重個啲係六至八次或以上。即使輕症係醫管局精神科排期都要一、兩年」。他希望政府盡早施行預防性工作，避免市民精神狀態繼續惡化。