關智斌（Kenny）最近在熱播中的內地古裝劇《長相守》中扮大理段氏的公子段月容，劇情要他男扮女裝，與同樣反串的內地演員毛曉慧，假扮成夫妻，兩人造型意外合襯，近日片段播出後，網民大讚Kenny索爆，唇紅齒白、輪廓分明，經過「裝假狗」後，古裝女性造型毫無破綻之餘，甚至散發出一點點韻味，惟他一開聲即大殺風景，令大家遐想幻滅。
Kenny昨日回覆《蘋果》時表示，因為與導演吳錦源默契十足，就算扮女人也沒有心理掙扎：「我對佢好有信心，佢都物色咗好多演員，最後覺得我勝任，搵我扮女人好有gimmick，亦係好大挑戰。」
厚粉炮製零死角
Kenny初時很有信心，不過上妝時卻遇上問題：「上妝後發現呢幾年做運動太多，塊臉好多菱角，尤其下巴位，因為女仔塊臉圓潤、飽滿啲，最終我要搽厚粉同打好多陰影先扮得似。」經過這次反串，他才發現穿古裝的女人唔易做，尤其本來胸肌已甚有睇頭的他，仍要「塞包」：「女人着古裝原來咁辛苦，化妝比男人多一個鐘，頭飾又重，黐眼睫毛又唔舒服，仲要戴胸圍，塞兩個包入去，條裙又窄，要行碎步好唔方便。呢次演出令我揣摩到好多嘢，我同導演一齊度蘭花手動作，工作人員又照顧我，有着數！」對於獲網民讚美，他說：「佢哋可能係我忠實粉絲，我朋友反而笑到七彩。」又稱將來就算要他演易服癖角色，他都不介意。
其實，除了Kenny，過往不少男藝人扮女人亦維肖維妙，例如Kenny密友張敬軒扮到幾可亂真，而經典的扮女高手還有張國榮，余文樂當年惡搞王馨平《別問我是誰》MV，及李健仁於電影《食神》的「如花」，亦掀起不少話題。
採訪︰陳杰