戰神伊巴謙莫域（圖）不時自認係當今球壇最出色球星，連兩大球王美斯同基斯坦奴朗拿度（C朗）都唔會放喺眼內。近日呢位瑞典射手為代言嘅瑞典飲品公司拍宣傳片，去面試嚟見工嘅女應徵者，就令到C朗「躺着也中槍」。話說片段中伊巴問嗰位叫Nicole嘅應徵者，問佢足球嘅偶像係邊個，Nicole毫不猶豫就答係美斯，當然令到伊巴有啲唔高興。不過伊巴之後再問點解唔係C朗時，Nicole就抵死咁話C朗成個演員咁、間唔中都會插水、又鬼死咁貪靚，總之唔係佢嘅類型，𠱁得伊巴好歡喜。2個人本身可以喺即將重開嘅意大利盃4強碰頭，可惜伊巴就因傷缺陣，而嗰場波亦推前1日喺6月12日禮拜五踢。