效力RB萊比錫前鋒迪姆華拿過去同利物浦多次扯上關係，不過，包括BBC在內嘅多間傳媒周四報道，華拿的確好大機會登陸英超，不過去嘅唔係利物浦，而係倫敦。有指車路士動用5,400萬鎊（約5.3億港元）成功截劫華拿，將呢位24歲嘅德國射手帶嚟英超。
過咗6月15要貴啲
一直有傳迪姆華拿嘅下一站係英超一哥利物浦，但係喺武漢肺炎嘅衝擊下，紅軍因財政理由，無意出5,400萬鎊嘅高價，所以喺呢次交易上打退堂鼓。車路士就決定滿足合約入面5,400萬鎊（約5.3億港元）買斷條款得到華拿，消息更指，萊比錫同華拿嘅合約設立買斷條款，呢筆贖身費喺6月15日就到期，過咗可能就要畀更高轉會費，所以車路士要喺限期前確定呢宗交易，報道仲話華拿已經同意個人條款，據稱周薪高達20萬鎊，下周雙方將會落實一切細節。
有指今次華拿成功「由紅轉藍」，除咗車路士喺疫情下都豪得起外，球隊中堅魯迪格亦係另一關鍵。魯迪格同華拿係國家隊隊友，兩位一直都有保持聯絡，魯迪格又會同華拿分享喺倫敦嘅生活，結果成功游說華拿加盟。
薛耶治補創造力不足
華拿可謂歐洲最炙手可熱嘅前鋒之一，今季喺德甲29場比賽轟入25球，加埋車路士季中喺阿積士買嘅摩洛哥中場薛耶治，下季嘅車仔的確令人期待，兩位嘅加盟將會增加球隊進攻選擇。今季車路士青訓前鋒譚美阿巴謙表現唔錯，多以單箭頭陣式應戰嘅領隊林柏特先要處理嘅問題，就係可唔可以令兩位年輕射手共存。今季華拿喺德甲亦曾間中踢左翼，加上𠵱家車路士兩位年過30嘅翼鋒柏度洛迪古斯同韋利安今季後就會離隊，預計華拿以翼鋒出戰嘅機會較多。
以年輕球員做骨幹嘅藍軍，隊中有好多唔錯嘅年輕球員，例如美臣蒙特、湯姆利同18歲蘇格蘭中場基摩等。不過，自夏薩特離隊後，球隊一直爭咁個有創造力嘅球員，薛耶治嘅加盟就可以補到呢個不足，27歲嘅佢可以踢右翼同攻中，令球隊喺排陣上有更多變化，相信球隊有呢兩位強援加盟，配合陣中有潛質嘅年輕球員，下季藍軍會係一支又青春又有威脅嘅前列球隊。
