英超周四開會，除咗落實復賽後換人名額由3人增至5人，亦基本釐定復賽後首三周賽程。根據英超賽會禮拜五喺官網嘅公佈，除2場補賽喺「6• 17」重開日上演，兩日後就會有熱刺主場鬥曼聯，榜首利物浦會喺6• 22同愛華頓上演默郡打吡。重開會由阿士東維拉主場對錫菲聯嘅補賽做揭幕，而另一場曼城主場對阿仙奴會喺同日稍後時間上演，兩日後嘅重頭戲，會係熱刺主場硬撼曼聯，比賽時間係香港周六凌晨三點。
至於萬眾矚目嘅默郡打吡，會喺本港時間6• 22嘅周一凌晨兩點鐘上演。假如曼城喺重開日嘅補賽不敵阿仙奴，利物浦只要喺呢場打吡戰贏波，就可以提早攞到本季英超寶座，但根據早前英警列出嘅「高危」賽事，未確定呢場波係咪喺愛華頓主場葛迪遜公園上演。另外，七月初嘅曼城對利物浦都已經表明要喺中立場打。