「港人集體創傷源於制度出現問題，好多人需要真相同政府回應五大訴求。」創傷同學會創辦人之一山地說，若政府願意成立獨立調查委員會還原真相，「可能已經醫好一半人」。她提倡港人要自救，且集體抗逆力，「自己好返，先可以幫到人」。
無形恐懼在蔓延
現時有數以千計抗爭者被拘捕，恐懼感存在每個人之中。「你問啲人會擔心咩，佢哋未必係前線，但身邊總會有一、兩個朋友係，會擔心朋友俾人捉、被失蹤。就算俾人拉，都會驚會唔會俾人屈，喺警署裏面點樣落口供」。她曾與一位被捕者家長聊天，「佢每日都要探喺荔枝角收押所個仔，點解每日都要探？佢好驚個仔俾人打，所以每日都睇住佢，睇吓個樣有冇變。因為你唔知幾多（傳聞）係真實，但成個恐懼就好明顯，令到啲人疲於奔命」。
她留意到這種無形的恐懼，在新屋嶺的虐打傳聞流出後更明顯，市民對警察開始出現不信任，「呢個普遍嘅恐懼係唔知俾邊班人捉，捉咗之後會點處理」。去年11月發生中大保衞戰和理大圍城，警察對學生暴力加劇，且態度惡劣。有些被捕者被收押超過48小時，甚至不許食飯和洗澡，即使父母探望亦不許帶食物。她憶述，探訪一名在運動中被控嚴重罪行的青年抗爭者，「問佢有咩可以幫到佢，佢嘅回應就係『你哋唔好忘記我就得』。呢句說話我聽落去好sad，點解唔忘記你係咁重要呢？」
港人集體創傷是不爭的事實，年輕人比例佔大多數。山地認為是未來公共健康重要議題，惟政府仍未進行相關研究，「政府係呢方面政策唔到位，基本上起碼做咗研究先，究竟𠵱家情況有幾嚴重，政府係責無旁貸，佢最多資源，社會需要亦係最大」。
不過她說：「如果政府做咗啲嘢，市民又受唔受呢？我諗年輕人𠵱家最大一個問題，就係對權威同既有制度已失去信心。」因此她認為政府要先回應訴求，「其實你問年輕人最想政府做乜，就係成立獨立調查委員會，你畀返個公平公義佢哋先，已經處理咗好多問題」。若政府願意踏出這一步，對於社會集體創傷的後遺症亦會減輕很多，「其實呢個係集體創傷，成個社會創傷嚟自乜嘢？就係制度出咗暴力、唔公義、唔公平問題。我哋好需要搵返真相，有呢個真相出嚟，好多人已經康復」。
她提出，港人自我修復好重要，「𠵱家好難要求政府搞個真相調查委員會，你唔知幾多年先發生，台灣二二八事件都係等咗好多年先發生。咁段創傷係咪冚住佢、壓住佢？唔得㗎喎」。她憂慮，港人的情緒由驚恐變成憤怒，她呼籲同路人集體抗逆，加強人與人之間溝通和聯繫，「覺得有人支持，就成為一種動力」。