中共極權，天怒人怨，用國安法搞到香港變成一國一制，更加引起英美為首嘅多國關注，甚至出聲指摘。
繼美國接連出招之後，英國人似乎都開始嚟料，英國外交及聯邦事務部喺六四前夕，出咗個網上招聘廣告，公然提供機會畀香港人勾結外國勢力，想喺香港請個政治人員幫手。
呢份將會喺英國駐港領事館返嘅工究竟有咩特別？根據LinkedIn上嘅招聘描述，形容係擔當一個繁忙而重要角色，會處身喺英國政府在港工作的核心位置，職責包括就香港政局發展撰寫深入、高質嘅報告；分析香港法庭一啲重要判案；參與編撰英國國會（香港半年報告）；就香港政治向英國政府提供政策建議。
職責捍衞《中英聯合聲明》
另外，更特別講明要籌劃同執行一系列有助宣傳同捍衞（to promote and defend）《中英聯合聲明》嘅活動。
當中共多次強調《聯合聲明》已經係歷史文件，英國人偏偏打對台，要提高外界對佢嘅認知囉。
呢份工歡迎香港市民、永久居民同駐港英國外交人員家屬申請，但冇特別寫明薪酬待遇係點。
網上引嚟回響嘅招聘，通常都係絕世筍工，但今次英國外交部呢份工，香港人如果應徵，八方提定大家要做好心理準備，可能要預自己有日會俾人捉去坐洗頭艇，又或者國安法殺到後，於是要面對莫須有罪名。
李八方