每年六四都係中共全年最玻璃心嘅一日，每場悼念活動、每句悼念說話，都足以刺痛暴政神經，一眾爪牙於是口吐狂言嘗試去掩埋歷史真相。台灣總統蔡英文噚日講「不必隱匿歷史」，同希望「這世界上每一個角落、每一片土地，都不要再有消失的日子」嘅帖文之後，黨媒《環球時報》總編輯胡錫進喺Twitter轉發同評論，但窮得只剩下錢要搵經濟數字反諷，其實只係自取其辱。
問蔡英文「沮喪同絕望嗎」
胡錫進喺Twitter話：「1989年大陸嘅GDP略高於台灣，係台灣嘅兩倍，到今天已經係23倍」，仲反問蔡英文「你會因為呢個變化而感到沮喪同絕望嗎？」以為拎中國國力強大出嚟就會攞到威，同時貫徹中共用經濟成就合理化當年屠城嘅歪理。
不過咁，話大陸經濟好過台灣，有啲常識嘅人都知同現實不符啦！中國因為國家規模咁大，GDP數字有急速增長絕對唔出奇，但總理李克強之前先自爆，全中國有六億人每月收入得1,000蚊人仔。八方再睇番經濟數據，根據國際貨幣基金（IMF）上年4月公佈，依購買力平價（PPP）計算，台灣人均GDP係5.5萬美元，而中國呢？係得1.95萬美元，唔知胡錫進見到呢個數，又有冇沮喪同絕望呢？