年底便踏入40歲的黃宗澤（Bosco），自從2012年前和胡杏兒分手後，他於2014年被揭發與模特兒楊崢譜出姐弟戀，縱使二人公開承認戀情，但情侶關係卻僅維持了21日便見光死！此後，有傳Bosco跟日籍女模Jun拍拖，然而當事人一直未有回應，似乎嚮往做「無腳雀仔」的Bosco，數年來身邊始終未有固定女友，直至3年前，有報道指，他因拍邵氏網劇《守護神之保險調查》，撻着比自己細12年的陳嘉桓，即使被發現齊返男方寓所，雙方也沒有認愛，但據悉二人暗交至今，仍未甩拖，陳嘉桓繼續不時現身男友於九龍城所開的蠔吧打躉，除了連續兩年在那裏慶祝生日外，甚至連胞弟的生日會以及跟朋友歡聚，她亦會選擇在該處，儼如老闆娘一樣。
翻轉豬肚當透明
表面看來，二人感情穩定，實情花弗慣的Bosco，又豈會為一棵樹放棄整個森林？有報道指，Bosco早前拍無綫劇《飛虎之雷霆極戰》時又「身痕」，對有份參演的余香凝生滋貓入眼，跟對方在劇中沒有感情線，單獨對手戲亦近乎零，但Bosco在拍劇期間卻多次向她出招獻殷勤，又主動約食飯。
據悉，余香凝對於Bosco的暗媾舉動不但未有落叠，更因其女友陳嘉桓是自己的好姊妹，篤灰舉報Bosco，有指陳嘉桓為此曾與Bosco炒大鑊。行走江湖閱女無數的Bosco，今次竟然失策老貓燒鬚，有指他經此一役後，在片場每逢見到余香凝都當對方透明，更向公司表明，即使要做宣傳，亦不會跟對方一齊做訪問，就是以後都不想和對方合作，實行斬腳趾避沙蟲，以防再有女友的線眼埋身。
異口同聲冇私交
對於此報道，昨日Bosco矢口否認：「無聊到極！我冇同佢（余香凝）面左左，開工嘅時候一班人都有講有笑，但私底下就冇聯絡過。」而余香凝則表示：「大部份劇集、電影出街，唔係傳不和就係傳緋聞，我可以講，係完全冇咁嘅事！唔係事實！不過我同Bosco喺劇中嘅對手戲其實唔多，私底下亦都冇聯絡，所以更加唔明白點解會傳成咁。」至於陳嘉桓則至稿前未有回覆。
採訪：唐琛悠