英超賽會同一眾球會禮拜四又一次開會，原本主力會傾復賽之後若果疫情再起嘅解決辦法等問題，不過最終會議只係決定咗英超重開之後每隊每場可以換五個人，同埋後備球員由7個加到9個，其他嘢繼續係拖字訣。
禮拜四嘅會議主要係傾如果武漢肺炎喺英國再度大規模爆發，球季會如何完結，會唔會廢除降班機制等嘅問題。一早已經預知會議入面唔會就任何議題投票表決。不過，最後禮拜四就決定咗復賽之後，容許每隊每場嘅換人名額加到五人，另外後備名單就會由之前嘅7人加到9人，令各隊喺排兵佈陣上有更大彈性。至於禮拜三英超亦都公佈咗第四輪病毒檢測結果，喺接受檢測嘅1,197名職球員之中，只有一人對病毒呈陽性反應。之後熱刺亦都公佈，證實嗰位確診者係隊內職球員，但表明嗰位確診者冇症狀，同時已經接受緊七日嘅自我隔離。