為掩飾警暴同推卸自己搞亂香港嘅責任，777、李家超同PK鄧連埋建制派，呢排成日將假記者同傳媒發放假消息等毫無證據嘅講法掛喺口邊，務求嘗試令大話講得多就令人以為係真。
早幾日元秋蔣麗芸就喺社交媒體出post，貼咗兩張美國警民對峙相，仲理直氣壯問網民「為何美國示威現場不見記者站在中間？」擺明想寸香港嘅記者成日阻住PoPo執法，不過佢咁做不但幫唔到政府，反而好快俾網民突破盲腸恥笑佢，短短幾日有逾3,000人留言，問元秋有冇諗過，如果張相唔係記者企係中間影，咁係乜水影？
黃藍網民留言混戰
其實元秋轉載張相，警察同示威者企咗喺左右兩邊，好快網民就突破盲腸留言反問：「呢張相係邊個影？你答我！」
實情如果記者當時唔係企喺對峙雙方中間，又點可能用呢個角度影到張相？之後形勢一發不可收恰，有網民恥笑「張相好明顯係記者企喺中間影，你唔係蠢到𠵱家仲未明呀」、「推到蔣麗芸諗吓自己講咗乜」，仲有人留言揶揄抽水，話「張相蒸出來㗎」、「梗係個警察用自拍棍影」，當然亦有藍絲留言撐，但好快又俾其他網民圍攻，結果變黃藍混戰。
對攝影明顯有認識嘅網民，就順道幫元秋長知識上一堂攝影課，話佢知有種拍攝手法叫POV，即係主觀視角，而張相正正係攝記主觀角度拍攝，當然見唔到自己啦！
至於始作俑者元秋，佢最後就冇理大家解釋，唔知以佢智慧，係咪真係明白個答案呢！
李八方
