賤男黎振燁今年4月被《蘋果》踢爆背着大肚老婆，靜雞雞約「無綫姣精」朱智賢在荒山野嶺幽會食蛋糕，偷食斷正後，黎振燁成為無綫棄卒被掟入雪櫃，不過向老婆跪地求饒後，獲得原諒。據知近日黎太產檢時獲知胎兒出現臍帶纏頸問題，幸情況未算太嚴重，兩夫婦為安全，擇定昨早剖腹生仔。
BB足月重7磅
前晚7時許，黎振燁駕駛偷食戰車載老婆入院待產，當到達醫院大門外，兩人坐在車內接受護士探熱，確保沒發燒後，黎振燁將座駕駛落停車場，他落車後到後座拿了「走佬袋」，黎太就自行開車門落車。雖然老婆臨盆在即，但黎振燁沒有拖實老婆行上產房，只是走近老婆身邊，幫她拿了搭在膊頭的黑色披肩。黎振燁陪老婆搭電梯上產房安頓，約半小時後，他獨個兒落大堂辦理登記入院手續和繳費，之後再上樓陪老婆，並整晚留在醫院陪老婆待產。
黎太昨早在醫院由黎振燁陪同下進入產房，剖腹誕下男嬰，母子平安。榮升爸爸的黎振燁在產房外等候探B和貼心呵護太太，見他樣子略帶憔悴，難掩初為人父的喜悅。到早上10時許，黎振燁現身產房門口，問到停工後太太住院有否經濟壓力、胎兒臍帶纏頸及工作去向等問題，他一概禮貌地說：「唔方便回答。」不過他直認初為人父心情既興奮又緊張，很心急探望母子。晚上7時半，黎振燁離開病房時說：「BB重7磅，足月，非常健康，老婆醒咗，啱啱食咗少少嘢，主要食粥，因為開刀，暫時唔可以進補住。」
朱智賢冇份開P
黎振燁自偷食事件後賠上事業，現時遭公司雪藏復出無期，據知他亦憂心前程，但無可奈何，現時只有靜待機會，希望盡快解封。至於偷食女主角朱智賢，之前有指被罰停工兩星期不能主持《東張西望》，惟14日停工令早已過去，但朱智賢至今仍未有復工時間表，有指形象跌落谷底的她，因為沒有監製敢用她，無綫亦擔心觀眾反感，勒令延長停工令。
前晚《東張西望》慶祝15周年，舉行了一個小型派對，叫齊節目中所有主持回廠切蛋糕，包括陳庭欣、陳貝兒等，但唯獨沒有朱智賢。至於「綠帽俠」謝東閔則沒有受到女友朱智賢偷食的事件影響，前日貼出親吻愛犬的相，心情看來不錯。
採訪：卓寶花、黃曉程
攝影：朱志聰、梁繼光、羅德光