港區國安法有何內容細節，大家仍然烏瀡瀡之時，已震動全球，令特朗普勃然大怒，直指香港一國兩制已死，已進入一國一制階段，香港並非特區而是與中國境內城市無差異，因此要取消香港之特殊地位（Special Status），但詳情仍有待公佈。特朗普講定先，可能係要等到六月尾國安法條文經人大審議通過、頒佈後，美國國務院再研究一番，再作針對性部署。
國安法係用嚟嚇人嘅，係預置殺人刀，最遭殃嘅係傳媒界、文化創意界以及知識份子，中共自1921年創黨以來，堅持要控制槍桿子，人民解放軍不是國家的，而是黨的，最高領導不是國防部，而是中央軍委會，汶川大地震時，國家總理溫家寶欲調動解放軍救災，軍隊不聽命，係要胡錦濤以中央黨委身份批示，解放軍先至起動救災，習近平2012年上台後，最注重一樣嘢，就係要牢牢控制解放軍，以貪腐之名清除幾隻大老虎如徐才厚及郭伯雄，擺自己人入核心位置。
有了槍桿子後可以用武力鎮壓中共最討厭、最懼怕嘅人物，就係有思想之人，故此老毛第二件治黨治國教條就係控制筆桿子，一定要清算文化界傳媒界教育界藝術界之非我族類，首先禁絕民間傳媒，嚴控網絡，禁絕一切異見異聲的創作，用乜武器呢？老毛時代就是用黨媒體作政治批鬥，21世紀就用經濟犯罪，貪腐為藉口清除異見份子，搵唔到痛處呀，就用國安法之顛覆國家政權、搞分裂，勾結外國勢力等莫須有罪名，拉人封艇，內地劉曉波，維權律師等皆遭受如此控罪。搞文字獄，中國有優良傳統，「維民所止」四個字就可惹來滅門之禍，港版國安法實施後當然唔會向普通地盤工人、基層埋手，以表現「絕大部份人生活不受影響」，而會係首先用嚟對付傳媒及讀書人知識份子，現在整頓香港電台已呼之欲出。現時黨媒周圍問富豪、大學等等表態，支持國安法，大富豪迫於無奈，正如李純恩講過，沒有不說話保持緘默的自由，已紛紛發言支持。黨媒窮追不捨，上星期有一條小標題指「八大學仍未表態」，劍指何方，唔駛畫公仔畫出腸！本地大學學者如陳健民戴耀廷馬嶽蔡子強就全係眼中釘，黨媒及自稱學者一定要用國安法來區別學府中人，務求迫使人人皆變成劉兆佳、曹宏威！牟宗三先生當年在新亞月會演講痛罵幫閒份子為毛澤東幫腔，洋洋灑灑講咗差不多一個小時。有咗國安法之後，誰人膽敢如此？