監警會早前成立調查小組，之後發表咗份千頁廢話報告，777即晚喺政總開記招，仲搵咗多幅黑衣人反送中示威現場相做背景，中間又大大隻字寫住「香港的真相（The Truth About Hong Kong）」，呢個所謂「真相」之後仲成為強推港版國安法嘅理由。
連登仔呼籲推爆
究竟咩先係香港真正嘅真相？相信數以百萬計港人心知肚明，有手足睇唔過眼，噚日發佈咗條同樣叫「香港的真相」嘅文宣影片，仲好用心整埋中英文字幕，希望等更多人清楚究竟咩先係香港真相。
影片全長4分39秒，解釋港人由和平上街示威，但政府無視訴求，仲以警暴鎮壓，於是令市民更憤怒，最終只能用武力自保，警暴問題亦越來越嚴重，元朗7.21（圖）、太子8.31同圍攻兩大事件嘅片段都有剪輯入去，影片最後用咗西灣河警察向兩個手無寸鐵示威者開槍畫面作結，一眾連登仔就呼籲一定要推爆佢。其實當大家拒絕遺忘守護真相，本身亦係同極權的一種對抗。