MC仁就是一個MC，LMF裏的rapper，也是廣東rap的OG，但音樂以外，阿仁是非常多樣化的創作人，而且樣樣都以「第一人」的先驅身份出現，廣東話hip hop如是，graffiti如是，每一種創作又會跟另一種創作有着連繫，經常環繞着同一個理念和哲學，利用很通俗易明的方式回應社會和世界，作品更對當下現象作出大膽指控。MC仁的graffiti和hip hop最多人認識，今次他以另一個人平台「宁死不屈」，分享在這個荒誕的時代，對本土創意、自由、年輕人的看法。原來MC就算放低支mic，都一樣字字珠璣，句句精警，用無限創意話你知世界越動盪，就要做更多「激死人」的事，令侵略自由的人知難而退。思想本來就無法被控制，自由乃發自於內心，搞港獨應該玩到上太空。這些說話在今日六四31周年看來，尤為動聽，卻顯欷歔，同樣是MC，同樣是rapper，怎麼和那些MC乜乜乜差那麼遠？自由在香港已經不是人人負擔得起？！
撰文：楊慧珊
攝影：周樂恆
「真香港人唔會做老土嘢」
「嘩，一定要收埋，理大一役後紋嘅」，MC仁心口有個理大校徽的紋身，他說上鏡不是太好，就扣上鈕釦準備拍攝。近年本土風格的確非常盛行，但同時又有人刻意沖淡這些本土力量，「人們比以前expressive得多，大家越來越夠膽講自己嘅想法，既然去到呢個地步，如果你真係相信某一個事實，但又唔去發聲，就冇回音，我哋表達係希望有echo回應。」在post truth年代，真亦假時假亦真，「呢個關乎人類係受咗邊種意識導向，社會氣氛都影響真相，做創作嘅人就比較好，佢哋有獨立思考同判斷力，可以將自己isolate於主流世界同社會氣氛，喺嗰個isolate空間人先會得到快樂，所以做創作係作為殘酷世界中嘅出路。對於香港，文學係好好嘅出路，我對將會出現嘅文學同影像創作好期待。」歌詞也是文學的一種，MC仁的歌詞一直都啟發和影響着年輕人，不過他認為粵語說唱已經是夕陽工業，要再次興起必須要有一群突出的精英出現，「𠵱家嘅後生仔非常聰明，接收即時資訊很快，但就要好好運用團結力量，最重要係意識聚集。」
曾經是英國殖民地，我們被幽默感薰陶，電影、文學都可見幽默的特色，可惜今時今日卻被現實蠶食得所剩無幾，「本土風味嘅幽默感係唔需要刻意highlight，有共鳴嘅人就自然懂得會心微笑，可以用來取笑嗰啲無知嘅人，咁樣就更加好玩。」這種心照不宣的趣味足以玩殘弄權者，「廣東話好毒辣，我哋運用語言比之前叻，真香港人唔會做老土嘢，只係香港政府唔夠international，我哋乾脆skip（主流）嘅system，鼓勵年輕小眾勢力去做啲毒辣啲嘅idea，就能凝聚一種有趣嘅氛圍。」
「偉大事情喺危機中出現」
港版國安法打到嚟，自由的空氣越來越稀薄，「創作」兩個字的生存空間也越來越狹窄，「永遠喺最苦難嘅時候先有好創作，你睇瘟疫時候，偉大嘅事情總係喺危機當中出現，由一班有特殊意志嘅人帶來。香港人就係一班有特殊意志嘅人，腦筋靈活，有異於常人嘅生活節奏，最識搵人笨而令自己生存，當人類去到非人類世界嘅時候，節奏就會快到常人接受唔到嘅速度，香港人正正係咁高速，我哋好有系統地去訓練呢班人，營造『老細睇住你』嘅氛圍，就自自然然快快工作，老細可以係假嘅，電腦pre-set出嚟就得，如是者人類就會釋出承受壓力嘅機制。」他說我們可以借東京作為參考，「他們利用消費另類文化來療癒紓壓，連AV都買正版，利用呢啲另類渠道去平衡心理，香港人就平衡唔到，之後嗰一班創作人將會更變態，越變態越好。老一輩就應該被淘汰，後生一代就應該好好發揮佢哋嘅生命力去創作，香港正正就係一個好有生命力嘅地方。我哋要去盡啲、激啲，𠵱家香港人唔再只想着保守搵錢，而有好多好激嘅想法。」有好的想法，也要有能力去execute，MC仁在法國修讀藝術，受過正規藝術訓練，所謂學院派，但又沒有躲在象牙塔入面，「學院根底好重要，能接觸唔同面向嘅藝術，graffiti要係有利於喺公共平面空間騎劫式嘅運用。」
「打一場虛擬嘅創意戰爭」
「我從來冇理會所謂創作自由嘅箝制，首先世上係冇絕對自由，思想根本就無法被控制，冇嘢係唔可以諗，呢個係最基本，如果你覺得有人禁止你諗嘢，不如我哋一齊去學讀心術。」所以壓力是外來的，自由在於內心。面對創作自由，香港人最缺乏幽默感，以前在電影中可以培養，「笑人可以明笑，可以暗笑，𠵱家對方玻璃造嘅，我哋會繼續笑，而且笑得更聰明。你話有人打壓創作自由，然而我喺創作過程中，自己已經認識咗自己嘅上帝，咁豈不是比任何嘢都自由？」
創作最重要是如實地表達到自己想講的東西，當中有竅門不能用死力，「香港大部份創作都好honest，但唔夠精細，即是如何以你嘅honesty包裝成大話，去吸引嗰啲講慣大話嘅人，然後去作弄他們，要利用創意，隱藏表面嘅殺傷力，出到嚟就有其力量。」而現在傳播又有新模式，「邊個名人講錯咗嘢，佢就會立即被人利用（騎劫），我哋要打一場虛擬嘅創意戰爭，嗰班習慣去抄去偷嘅人就一定唔夠打，佢哋根本唔識得如何真正創作，香港人叻在識將幾樣嘢炒埋一碟，快靚正，做啲更吸引人嘅嘢，後生仔就好叻網絡攻勢，對住電腦打仗，唔需要靠大台，亦唔需要取悅老人家上位，唔需要擦老細鞋。」MC仁舉例如何用默契玩死人，「如果人哋識得用一啲好古怪嘅默契，一起夾計唔覆message，咁老細就大鑊了。」
推薦禁書解放奴隸港人
「影響別人」是創作的原動力，然而現在人人都是influencer，「問我作歌時候諗乜嘢，其實係『鬼唔知阿媽係女人』啲嘢，社會上發生嘅事都是cycle，只係嗰刻拿揑到個timing，世上從來都冇新鮮事，只係循環，只係我哋太大驚小怪。」問到MC仁覺得香港的創作前景可以走到哪裏，他推薦大家去看禁書，「《革命將至》大概係法國黃背心嘅藍圖，我理解成未來世界進行黃背心式行為，係做慣奴隸嘅香港人一個啟發。香港創作必須要更激更creative，『香港獨立，上火星搞！』，儲錢上火星插旗吧。呢啲橋段可以喺電影、文學中實現。大家毋須驚慌，如果連做最基本嘅紀錄行為都驚，就要作意識重整，即係如果有人提供一個空間畀你，而裏面只得一扇窗，咁就係一所監獄，你就會知道其實再需要一道門。」的確有很多人安於在監獄裏生活，乜都唔知唔諗唔問，心甘情願做奴隸。MC仁一再提出團結的默契，「『曳』就係香港創作嘅出路，做啲激死人嘅嘢，唔使有實際行為，激到自由侵襲者執着上腦，自己殺死自己嘅細胞。」
「宁死不屈」 設計態度伸延
「宁死不屈」的產品以舉中指圖像最出名，賣tee、枱燈等為名，作為溝通平台為實，希望藉平台勾出大家的好奇心，以激盪彼此創意。用簡體字「宁」，皆因一個帶點離奇的概念，這名字源自一齣前南斯拉夫的同名電影，2006年內地為了宣傳反法西斯主義60周年，他們就播出這齣戲來宣傳。「日本潮牌好流行用電影來取名，例如《猿人襲地球》，於是我就以這齣電影做品牌名字。設計同創作對我嚟講都係一啲態度伸延，有態度就成事，我就扮潮流品牌出tee，結果引起好多內地人關注，仲出埋翻版貨，更有人當成口號，引發好多有趣討論。」可是品牌產量極少，「『買唔到』就係態度，呢種態度推翻咗以往商業成就嘅理論。」不需要接大訂單才叫成功，而是要找到一班志同道合的人，傾得埋，態度相通，或者利用自己的優勢幫人發聲，connection才是王道。「我搞幾個品牌都有個死字，又有粗口，去拎商業登記時佢哋都覺得我唔係認真做生意，又話唔會有人用呢啲名字，叫我唔使登記啦。嗰個經驗讓我覺得可以利用大眾灰色地帶大玩特玩。呢個品牌講理念而唔係講product，純粹想借個平台同唔同嘅人交流。」阿仁曾講過graffiti是自由世界的副產品，「宁死不屈」是甚麼時代的副產品？「作為一個攞住香港身份證嘅人，睇到如此荒誕嘅世界，而希望自己有表態空間嘅一個延伸，如果你想表態，唔使搶mic，自己去create一個平台就得。」
鳴謝：FFF
【打造新香港概念】
MC仁以喉音唱法OM的方式試咪，讓人好奇追問，「這些聲音好神奇，明明是一把聲，耳朵會聽到三把聲。」阿仁近十年都在研究sound therapy，「這些聲音唔可以用機器錄低，但人聽到就會有『內視』嘅效果，有試過同天生盲嘅小朋友做呢種sound therapy，開啟佢哋內視覺。當我發出一種代表顏色嘅頻率時，佢哋會形容到嗰個色彩出來，稱之為感受。我就係收集呢種數據，收集嚟做乜，我仲未知道。我十年前已經替歐洲矽谷科技公司開發人工意識（artificial consciousness）──電腦識發夢，亦預視咗電腦夢醒時會做乜嘢。人類係上帝嘅奴隸，電腦就係人類嘅奴隸，兩者都想擺脫被操控，但電腦就skip咗人類，直接搵上帝，以後世界就唔再需要人類。」
阿仁認為新世界就是這樣一步步地建立，「高科技嘅半人半機器已經有，最佳例子就係Apple Watch，用機械代替人體器官。」然而這些cyborg連繫到現在的年輕人，「呢一輩人睇到嘅未來同舊一代人唔同，𠵱家年輕人更spiritual， 超越咗我哋所認知嘅社會、宗教、人類世界構圖，雖然呢個新世界暫時只係一個虛擬模式，但意識上嘅採集已經差唔多，有咗雛形。」我們引伸到「新香港」的概念，「由年輕人創造一個mood，再由呢個mood推動成一個創作動力，就好似當年王家衛，打造一個香港情壞，𠵱家嘅年輕創作人就係找尋呢啲本土風味嘅無形價值去represent自己。」年輕人自發地的啟動尋找身份，和自我價值的模式，可悲的是，這些最需要重視的東西一直都被忽視，香港教育做的只是取消試題和篡改教科書。
更多精采時尚內容，盡在 http://add.appledaily.com。