上星期三（5月27日）開始，一連三日中午時分，左丁山行經中環畢打街，都見到防暴警及巡警滿佈，北面「守護」花旗銀行，南面站滿馬莎路口，如臨大敵。星期三係有示威堵路事件，其後歸於平靜。星期四五都冇事情發生，鄧炳強仍然有此安排，可見得特區政府認真為今個月底港版國安法面世而部署，到時又唔知場面會點咯！
行吓行吓，首先碰到投資銀行高層I，佢就在附近大廈上班。問佢：「美國佬會點呀？」賓架I答：「點知吖？」不知目前環境好緊張，有港大同期校友講緊移民，「我適值係搵銀收成期，唔係幾捨得走，老婆又催促要為個仔搵英國寄宿學校，真心煩，你係前輩，有乜idea？」1982年、1989年時左丁山同輩有同類問題，勢估唔到今個世代嘅當打賓架又要為是否移民煩惱。左丁山未移過民，冇一手實際經驗，但只知道當日急走嘅銀行朋友一走，下屬上位取而代之，一位老友拿了護照回來，返回銀行要做番舊下屬嘅下屬，從此身心不樂。當年外資銀行為了挽留人才，主動幫手為高級人員辦理加拿大護照、法國護照、澳紐護照等等，今日唔知會唔會呢？賓架I話：「仲未聽到有。」
是否移民，有太多個人與家庭事務問題要考慮，個個case不同，幾難畀意見。拜拜之後，又碰到律師J，專做刑事案辯護律師，不少客仔係社團人物，問佢最近生意如何？佢話：「刑事辯護案件直線下跌，少咗好多生意，唔係香港冇人犯罪，答案就在畢打街，你睇吓呢度咁多警察，想像吓其他地區係唔係少咗警察？警察現在集中人力嚟處理示威事件，單係星期三就拉咗396人，其中近180人係𡃁仔（teenager）學生，點得閒去拉其他罪犯呀？」律師J又夠心水清，咁都畀佢諗到，傾傾吓方知律師J嘅意見偏於藍色，痛罵示威者搞破壞對香港經濟絕無好處，又唔會達成目標，因為阿爺絕不退讓，細路仔又唔夠打，咁樣鬧阿爺做乜噃？大家靜靜地搵銀咪好囉！此位傾藍律師起碼夠坦白，就係搵銀第一，唔好同惡爺嘈交。於是問佢：「你一早又唔同行家鄭若驊講，唔搞送中條例咪好囉！」佢聽到青筋出現咁話：「鄭女士係一位建築法律大律師，律政司都唔係嗰皮，我知佢本來唔想做嘅，但say no不成，就畀林鄭掹咗上船。」鄭女士依家知道後悔未呢？咁啱撞正中美反枱交惡，內外交困，如此非常時期兩位姓鄭女士企在前面，香港好運何來。