中共霸王硬上弓強推港版國安法，一眾賣港保皇黨就全力配合造勢，發起所謂全民聯署，仲話短短八日已經收集到290萬個簽名喎。不過計落條數，連香港人口一半都唔夠，套用保皇黨慣用講法，即係香港有過半沉默大多數人係唔支持立法啦！保皇黨呢鋪總動員都「創造」唔出應有民意，咁嘅表現，應該先係危害國家安全嘅「短板」。
枱面前趷高腳簽
不過，當任佢哋篤嘅簽名人數，表現都可以不似預期；最奇係佢哋仲公然將呃呃𠱁𠱁收集簽名過程公諸於世，之前演藝界份聯署已被踢爆有大量「被聯署」、一人聯署幾次、去世嘅人都出現係名單入面。八方噚日抱住浪費寶貴光陰嘅決心，上咗去「香港各界撐國安立法聯合陣線」個網站睇番佢哋之前嘅每日更新，原來去街站簽名嘅唔只大人，仲有幾乎要趷高腳先夠高喺枱面簽名嘅細路。從佢哋年紀推算，相信人大通過嘅立法決定草案，標題咁多隻字都未必識晒，更加唔好講乜叫國家安全，簡單嚟講，咪係濫竽充數囉。
保皇黨近排全面統一口徑，將國安法形容做「對抗暴徒恐怖行為嘅最好方法」，即係大家第日上街遊行令佢哋覺得恐怖，可能隨時會舉報大家危害國家安全。不過，八方從佢哋收集簽名過程影低嘅相就先發現一件更恐怖嘅事，就係原來佢哋呢八日之間，做出大量違法群聚行為，同777一樣公然違反限聚令，換句話說仲可能傳播埋武肺病毒，咁樣發動另類生化襲擊，仲唔係恐怖主義？
李八方
