講起香港貧富懸殊，馬主F竟有感觸，因為細路哥時，佢亦係窮孩子一名，瞓冷巷碌架床長大嘅，依家發達，於是在新界買一間house畀阿媽住；養阿媽理所當然，但養仔，仔就不願接納。故此一個開明教育制度之下教出來嘅年青人，有自己自由思想，點會接受楊潤雄局長嗰套教育觀念──若分析利多於弊就係受誤導，老師教壞學生吖。楊潤雄，蔡若蓮，陳碧華，康陳翠華呢一班人領導教育局，香港教育邊度會有生氣有創意噃。馬主F位公子，原來讀國際學校，後往英國寄宿學校，考入UCL，畢業之日，F公子對馬主F講：「我入大學時已知道你用咗好多錢供我讀書，我好感謝，從今日起，我要搵工，以後唔再使你錢。」果然講得到做得到，唔肯返香港（返到嚟老竇可以介紹工作），一個人在倫敦求職，卒之搵到份銀行工，月薪二千餘鎊，扣租之後就係「月光族」，同幾個同學租屋住，計起嚟亦似在香港住納米樓。F公子何解有咁大決心在倫敦捱，唔返香港跟爸爸吃蟹黃翅撈飯呢？
原來佢讀寄宿學校時，見到有不少中國官二代，紅二代，富二代，個個似薄瓜瓜咁款，使老竇錢唔抹腳，又有中東酋長兒子，出入有司機及黑人保鑣保護，代買漢堡包及到Harrods買床褥，唔用宿舍件cheap貨，然後有好多俄羅斯富二代，二十一歲已到夜總會由保鑣陪住，左擁右抱，與一群美女飲香檳當飲水……，F公子在UCL又碰到一啲香港同學節衣縮食去完成學業，非洲學生到處搵兼職交學費，於是F公子覺得自己有父親做後盾，好夠運，但由此亦了解到世界貧富懸殊，收入差距太大，做伸手派公子實在羞恥，故此畢業後就下定決心在倫敦打工養自己。
馬主F話老婆好唔捨得個仔在倫敦住，不時寄一二千鎊過去，點知兒子收到就滙返嚟，唔肯要，故此馬主F話：「我好討厭TG，討厭示威，我只想香港安定，等我賺錢食翅，但同時我又好明白兒子心情，明白香港年青人點解上街。不過，林鄭等人可能乜都唔明白。」佢地點會明白吖，香港每次有大事，國家就派員嚟講嘢解畫嘅，一定係老態畢現嘅董建華，兩位老婦人梁愛詩譚惠珠，兩位潑辣議員葉劉淑儀，梁美芬，再加一位叫做梁振英，呢個陣容一字排開，所有80後，90後，千禧後年青男女，立即彈開熄機冇眼睇，唔會聽！伍淑清講放棄香港年輕人，有佢嘅自由，但佢已經年過70，年輕人放棄佢更加容易，政府及教育局成日以為香港年青人受誤導，殊不知一批老翁老婦已被時代放棄了，有乜資格講引導年輕人？