自從美國總統特朗普話會因為北京通過港版國安法，會對香港作出制裁之後，好多港官立即撲出嚟話唔怕制裁，噚日到財政司司長陳茂波出招，係咁話即使美國取消香港特殊地位，亦唔會影響香港國際金融中心地位，但奇就奇在佢講講下忽然雙眼通紅，仲大庭廣眾流下男兒淚！究竟點解又話唔怕但又會喊？
出po賴燈光傷眼
波波噚日去立法會財經事務委員會，佢就梗係講到即使特朗普話美國對香港的特殊貿易地位、甚至制裁涉嫌侵害香港自由嘅中國同香港官員，港府都冇有怕，之後佢再見記者，再被問及港版國安法同美國制裁對聯滙影響，當佢講到「中美角力不單令國際金融中心地位不受影響，更能為香港帶來新機遇」嘅時候，記者見到佢忽然雙眼通紅，仲邊講邊流眼淚，嚇親唔少在場記者。
究竟波波為乜突然悲從中來？有政圈好事之徒猜測，係咪同特朗普話制裁涉嫌侵害香港自由香港官員有關？唔通波波親友喺美國有資產，怕制裁會影響到自己同親朋戚友？定係波波諗起佢嘅美國養父、美軍中尉契爺Bruce Brown，所以一時感觸呢？
到咗下午波波喺社交平台自己發文解畫，話因為「眼泛淚光」呢件事，突然收到好多朋友嘅問候，但佢話其實「只是一場誤會」，因為佢接受記者訪問時「可能講得比較長氣」，加埋攝影機頭嘅燈光，令佢睇落好似有「淚光」，又話對於要經常睇文件、又成日唔夠瞓嘅人，眼睛保護確實十分重要，唔可以掉以輕心，仲加埋「#有冇眼藥水介紹 #被流淚」等hashtag，不過又有人睇過條片同八方講，真係唔多似係反光喎，而且有時候越解釋，令人越覺似掩飾！
李八方