因為武漢肺炎而停擺超過兩個月嘅西甲，賽會喺周日官方公佈6月11日重開後，首兩輪賽程同之前報道一樣由西維爾主場對貝迪斯嘅塞維利亞打吡會打頭陣。至於有多人中過武肺嘅西甲球會華倫西亞（白衫），喺周一就發聲明鬧爆歐聯16強對手阿特蘭大教練加斯柏連尼，事關佢之前話自己出現武肺病徵後，仍堅持帶隊作客，華倫認為佢冇做任何預防措施，喺佢逗留西班牙期間為唔少人帶嚟危險。雖然華倫喺呢件事上好正義，不過武肺康復者之一嘅33歲阿根廷守將加雷，禮拜日就喺網上拍片鬧爆球會唔同自己續約！不過華倫就話係加雷唔肯減薪、拒絕續約在先，預計6月30日合約到期嘅加雷好快就會離隊。