以往踏入六月，歐洲主流聯賽都會開始唞暑，不過今年受到武漢肺炎侵襲下，今個夏天就冇呢支歌仔唱喇！其中英超會喺6月17號正式重開，一眾英超球星都要喺炎熱嘅夏天之下比賽，都咪話唔辛苦㗎，所以有報道話英超賽會計劃引入補水暫停嘅措施，即係飲水時間喇，等班球員可以喺大熱天時成30幾度踢波嗰陣，都可以補充到足夠嘅水份。
水樽都要社交距離
其實根據國際足協嘅守則，球員可以喺比賽期間有兩次飲水時間，喺2014年巴西世界盃，或者以往歐洲球隊夏天嚟到亞洲踢熱身賽，通常都會喺比賽第30同第75分鐘暫停3分鐘，畀球員上、下半場各踢到一半嘅時候走到場邊飲水，但歐洲正式比賽就好少咁做。不過英超早前已經批准禮拜六、日喺中午時份有比賽，但因為氣溫隨時超過30度，或有機會畀球員飲水。
不過武漢肺炎病毒仲未完全消失，飲水呢個環節都會更加講究，以往啲球員可以見到水樽就拎嚟飲，隨時有機會散播病毒㗎！所以每位球員同裁判，都需要飲番自己專屬嘅水樽，而且每個水樽都要保持兩米距離，飲吓飲吓隨時會令比賽延遲長達10分鐘。事實上英超喺15年8月，因為熱浪來襲曾經引入過補水暫停，當時喺比賽第25分鐘暫停90秒畀球員飲水，結果被好多球迷喝倒采。不過英超重開後球迷都唔准入場，相信唔會怕畀球迷噓喇，據報禮拜四嘅英超會議上，亦會就有關補水暫停進行投票。
播打機聲效搞氣氛
講到英超重開，最開心嘅梗係榜首嘅利物浦喇，佢哋爭2場勝仗就可以贏到30年來首個頂級聯賽冠軍，復賽後第一場就要對同市宿敵愛華頓，上演默西塞德打吡，紅軍領隊高普就話：「我哋會每日增加訓練強度，我諗需要19或20日恢復比賽狀態，希望對愛華頓時就達到100%，𠵱家仲有三個禮拜時間準備。」
雖然高普就好期待英超重開，但都唔好太老定，事關喺英國政府嘅醫學指引下，所有確診武肺嘅球員，即使佢哋冇病徵，至少都要觀察14日，確定體內冇病毒先可以重投小組訓練。目前英超每星期都為球員做兩次測試，意味下個禮拜如果邊位球員確診，就趕唔切英超首輪重開嘅比賽，或者要留喺屋企睇波喇！另有報道話，為咗改善電視觀眾睇閉門賽事嘅氣氛，英超或會批准各支球隊，利用著名足球遊戲《FIFA20》嘅球迷聲效，加入直播片影之中，但呢個唔係硬性規定，用唔用始終由各支球隊自行決定。