【黑鏡線索】
1. 武肺令全球停擺，好多公司面臨極大挑戰，科技界最近熱烈討論，所謂wartime CEO vs peacetime CEO。
2. 簡單啲講，peacetime CEO係喺穩定平台上搞大佢，wartime CEO係負責帶領公司，捱過可以足以致命嘅危機。
3. 重點係，兩種情況需要完全唔同嘅操作。正如國家層面，可以分wartime leader vs peacetime leader。
4. Churchill晨早話希特拉要提防，大家當佢儍，所以一直喺政界邊緣。一如Trump廿年前已經話中国偷呃拐騙，唔可以縱容，主流當佢發噏瘋。
5. Churchill同Trump唔係大眾心中理想嘅peacetime leader，但喺亂世，去到臨界點，遇着existential threat，就係呢啲人出馬嘅時候。
6. 甚至有人預言，歷史未來會評價，Trump都只不過係Chamberlain，Churchill仲未出現。呢個係另一個話題。
7. 領袖可以就住時勢更換，但你係自己生命嘅CEO，冇得換。即係，peacetime係你，wartime又係你。
8. 惡搞嘅係你遇到一啲成世仔未遇過嘅大情況。所以亂世自處嘅難度，係在於如果成世都只係試過peacetime，咁wartime點操作㗎大佬？
9. 即係例如，商業潮流大家一向好興just in time inventory，但遇着大瘟疫，咁就瀨嘢。個人層面，我自己一向係反囤積人士，有乜要嘅時候先落街買囉。如果唔係老婆晨早上網狂㩒，我係應該冇口罩用嗰啲人。
10. 好多嘢，真係成代人未遇過。大瘟疫對上一次，係1917年，屬於太爺嗰代。對上一次大國冷戰，係阿爸嗰代先記得，等同「樓下閂水喉」嘅制水級歷史。
11. 俗語有話，歷史係押韻嘅。上次係點收科呢？引發咗啲乜？搞咗幾耐？啲人點捱過嘅呢？
12. 押韻，但唔係重複。點知邊次事件喺邊個層面最有參考價值，超考工夫。2020嘅香港，係1975前夕嘅貝魯特，1919前夕嘅愛爾蘭，1963前夕西柏林，1965前夕新加坡，定係1949前夕嘅上海？
13. Peacetime講回報，wartime講保本。美中正式脫鈎，而家美國畀緊美資可能係最後一個機會窗口撤退，頂住到門多一陣。
14. 有報道話呢幾日找換店排晒長龍。對上一次香港銀紙變廢紙，係二戰軍票，阿爺級歷史。對上一次驚變廢紙，係1983香港前途危機加股災，係阿爸時代。
15. 買美元係驚脫鈎，排長龍開戶口就係某啲銀行出事，俾人制裁、中国爛賬、被「国家」徵用。
16. 朋友問，知唔知乜嘢係算盤子，原來係（黃）金仔，佢話近排都俾人掃晒貨。買算盤子傍身，一次解決脫鈎同埋銀行出事。
17. 正如一百年前瘟疫隔離見唔到人，2020大家起碼有得用zoom，2020保本除咗金仔，都有科技搭救。
18.朋友高健整咗個decentralizehk網站講USDC（美金掛鈎嘅加密幣），拍咗條YouTube片，你當係「三分鐘開離岸公司懶人包」，好值得睇咗佢，唔即刻做都睇咗先。
19. 喂，加密幣唔係好多呃人嘢咩？只可以講，喺呢個一国一制時代，識得分邊啲係「甄子丹Bitcoin發達秘笈」，邊啲係亂世真hedging工具，已經係生存指南裏面嘅必備知識。
20. 「靈魂內有信仰 / 搶不去 / 這種搶匪也許 / 比你畏懼 / 想保無邪之軀 / 還是必須好好過下去」（最後的信仰，林夕）。
撰文：宋漢生
fb : sunghsblog