正準備開機訪問，區嘉雯用氣聲輕輕在記者耳邊說，「你陣間唔好提我排緊𠵱家套舞台劇啲嘢呀！」再補多句，「費事啦，𠵱家做緊《叔．叔》宣傳，唔好提第二啲戲！」
區嘉雯就是這種老派人。老派人有老派人的一套，很懂人情世故，說白一點，知碇。說區嘉雯老？今年已67之齡，但她真人不像《叔．叔》的師奶，一頭長髮穿上傘裙的她，還有點少女味。
這位新鮮出爐金像女配角，雖說是第一次拍電影，但其實區嘉雯有多年舞台劇經驗，先後已拿過三次劇后，《劍雪浮生》演仙姐就是代表作。本業是中學老師的她，移民加拿大再去美國，經歷結婚離婚再回歸香港，區嘉雯的故事，已經可以拍齣戲。
父母先後離世，區嘉雯離婚後獨身至今，她卻說：「我enjoy孤獨，我諗係我自細嘅習慣！」孤伶伶冇所謂？「暫時冇所謂，可能再老啲咪入老人院囉，因為我啲屋企人都唔喺度。我覺得人始終到臨尾，你都係一個人去行！」
孤身走我路，寂寞，但可以笑住行。
撰文：文嘉龍
攝影：林德雄
你唔好拖累人就得
《叔．叔》戲中，區嘉雯的「情敵」是個男人，她與老公和情敵三人同場的那一剎，表情不多也不少，恰如其分剛剛好，對有多年舞台劇經驗的區嘉雯來說，要放，很易，懂得收，才難。
「舞台靠身體語言、眼神，同電影好唔同，電影唔可以凌厲眼神呀，要減返好多！導演一早同我講，佢希望拍一個小津安二郎式嘅小品演法，我話我明喇，因為我喺大學都take過一個course，係小津安二郎作品，我知道係好淡，淡到不得了！」
淡如水，也可以有滿滿的演技。事緣《叔．叔》導演楊曜愷經話劇團老闆聯絡上區嘉雯，兩人為劇本見面多次，區嘉雯經過遴選才得到角色。「我仲特登去買咗一件好師奶嘅衫，個角色係咁！以前話劇團都有遴選，我都會自己揀一啲衫或者諗一啲嘢。今次我買咗套衫，喺香港大學有個地方遴選，我去到仲話，你等一陣，我要換衫呀，紮返個頭整返個樣啦！」
為遴選交足功課，選不上，也只是蝕了一套師奶衫；選中了，現在贏得一枚金像獎。處女下海拍電影，區嘉雯說：「適應到，你幾廿歲人要適應一啲嘢唔係好難，你唔好拖累人就得！」
電影圈是新手，區嘉雯在劇場界是老行尊。她考上香港話劇團那一年才是劇團剛成立，1978年為了做全職演員，區嘉雯辭去了中學英文老師一職，而鼓勵她報名香港話劇團的，正正是她的學生們。「嗰陣我好後生啦，教書又教得唔係好開心，你初畢業出嚟同啲學生嘅年齡唔係差好遠，第一份工係教書，我一向都係教英文！啲學生見我唔係咁開心，佢哋話人哋話劇團𠵱家招人，你不如去，我又去試吓啦！我爸爸又好supportive，佢唔出聲，但係佢唔會話，唔得，你要咁你要咁……我阿爸從來冇對我咁樣！我做咗之後先發覺真係我自己最鍾意嘅嘢，有時就係咁，有啲人好幸運，佢一早就知自己想做啲乜，我諗我唔係嗰種人囉！」
我阿爸係我最懷念嘅人
區嘉雯的家庭，大概也足以拍一齣《爸爸》。她是家中長女，下有兩個弟弟，母親在她十歲時因卵巢癌離世。母親重男輕女，只錫兩個細佬，區嘉雯還幸有爸爸的寵愛，「你明㗎有好多嘢，因為我阿爺係因為我細佬，先至對佢（媽媽）好，變咗佢更加對我細佬好啦，好彩我阿爸就錫我！惟有勤力啲讀書，等阿爺可以睇到你啦，唔係見到你都唔知你係邊個！（嬲媽媽錫細佬？）細個嗰陣梗係有少少，但係我阿爸錫我，我有人錫，你估我冇咩！」
她與爸爸無所不談，「我阿爸教我好多嘢，佢係我最懷念嘅人，我阿爸都唔喺度廿幾三十年喇，真係最懷念！」
自細區嘉雯學識為自己解決問題，「我個人有一樣嘢好，我好快同自己開解到，我諗同我媽媽喺我好細個已經唔喺度有關，我屋企得兩個細佬同埋我阿爸，我變咗最大，同埋我係女人，係比較成熟啲，加上你冇媽媽，變咗我由細到大有個習慣，自己同自己傾偈，我變咗好多嘢可以自己同自己解決！」
區嘉雯兩個弟弟到多倫多升學，區嘉雯則到美國讀大學，她爸爸好早已搬到多倫多，區嘉雯是最後一個家庭成員移民的，那年是1987年，算是初代移民的故事。論相處日子，兩父女其實不多，「有一段時間我又去咗美國讀書，然後我阿爸又去多倫多先，我自己喺度（美國畢業回港）七年後我先至去，其實前後數埋，一齊日子唔係好多！我媽媽唔喺度之後，我爸爸有自己一個家，嗰陣好得意，我阿婆由細到大喺我耳邊話，後底乸唔好㗎、後底乸唔好㗎，我阿爸又俾我咁樣喎，我話我唔跟你去阿姨度一齊喇，你同細佬哋，我同我阿婆喺舖頭住（爸爸經營汽車零件）！我諗我阿爸有少少縱我，你點可以咁樣啫，你應該要跟埋去，所以我同我阿爸相處日子唔係多，但係一齊住幾耐唔係好重要，一齊時候嘅質素先重要！」
移民多倫多後，區嘉雯經朋友介紹認識了當時的男朋友，兩人結婚後搬到美國加州定居，與老爸又再分隔兩地。「我喺美國嘅時候，我阿爸寫畀我嘅信，我全部都keep住，我阿爸，哎吔……唔得，我會喊㗎，唔好講喇……我阿爸病嘅時候，我話我要嚟睇住你，佢話唔好，阿女，你有你嘅家庭，你唔使過嚟喇，佢話你總之你得，就過嚟睇阿爸……」區嘉雯在爸爸身上，發現愛情原來沒有永恒，「我阿爸待我阿媽真係好好，因為我阿媽病嘅時候，佢成日陪住佢，但係我阿媽唔喺度冇幾耐，我阿爸又有第二個，我覺得好奇怪，我十零歲啫，原來愛情唔係永遠㗎喎！」
其實人係怕寂寞
愛情沒有永恒，人總是怕寂寞，「嗰陣有一段時間嬲我阿爸，但係大少少已經冇呢個感覺，因為你知道，其實人係怕寂寞，我阿爸係怕寂寞嗰亭人，後來到好後期，我仲成日叫佢不如你搵返個人，我阿爸個脾氣係好難頂，所以後來都散咗（另一頭家）啦，佢去加拿大嘅時候已經係一個人，我話你不如搵返個人啦，佢話唔搵，我同我阿爸反而有好多嘢可以傾！」
區嘉雯自己的婚姻也沒有永恒，她在美國離婚，「離婚有好多原因，其中一個原因就係細路仔嘅問題，我唔係特別鍾意細路，佢好鍾意細路，呢個係其中一個主要原因！」離婚後兩人至今仍是朋友，前夫偶然返港，仲會約她飲茶見面。
在美國的生活，區嘉雯一直在一家律師樓工作，她說兩個老闆待她很好，她期間返港演出《莎莉要飛》和《劍雪浮生》舞台劇，向律師樓請辭，老闆也說找替工代她，待她演完舞台劇返美後可重回崗位。到了2003年，區嘉雯才正式回流香港，「離咗婚，我覺得我需要一個新嘅開始，你喺美國繼續都得，我老闆好好㖭，我一離婚，佢即刻加我人工，邊度會有咁好嘅老闆，大佬，只有減你人工啫，佢加我人工喎，但係我同自己講，如果我能夠返香港我會最開心，嗰陣我阿爸已經唔喺度，我又冇掛慮，返嚟香港，我冇話諗住做乜嘢舞台劇，只不過香港，我喺呢度大，生活模式比較適合我！」
回流那年遇上沙士，「我仲記得冇飛機返嚟香港，美國冇飛機嚟，又冇飛機去，完全隔絕，我老闆先至問我，你𠵱家仲返唔返呀，我話如果冇事，我返，點知突然之間冇事，我7月返嚟，之前睇電視仲見到個個戴啲唔同型口罩，好慘，苦中作樂囉！我老闆成日都咁講，你真係唔開心，你就返嚟啦，呢度成日都有份工等你，佢真係待我好好！」記者多心，不會是老闆對你有意思啩？「儍啦，唔係嗰啲咁嘅嘢，純粹真係好老闆，我冇講嗰句就係，我係好僱員，哈哈哈！」
重回香港，區嘉雯的正職再次當回中學英文老師，又做舞台劇又教書的生活，前幾年退休了，這十多年來，習慣了獨來獨往，「我諗係人都怕寂寞，問題係你點樣去排遣呢個寂寞，我諗我阿爸係唔識得去排遣呢個寂寞嘅人，我係好識得排遣我嘅寂寞嘅人！」想找個伴嗎？「呢啲唔係話你搵，唔係搵件衫喎，搵到一個人而大家要夾，又要有緣份，唔係咁容易，如果so happen可以發生，咪俾佢發生囉，唔係夾硬嚟，仲辛苦仲累人累物，我最怕呢啲！」
又是為別人着想先。
後記：4點食晚飯
區嘉雯真人怎樣看，真的不像67歲，雖然她在舞台或銀幕上都演盡老殘弱。三屆劇后，保持生活規律，有段日子，她每天下午4點已食晚飯，「我記得未移民，《蝦碌戲班》嗰套戲要走嚟走去唔停，我最記得去高山劇場，我習慣好早食飯，我4點幾就食；有啲演員唔食飯，佢哋唔鍾意，佢哋要之後食消夜，我唔係，我一定要食飽飯我先至可以去做嘢，我之後唔食消夜！」
健康最緊要，「我生活好悶，好有紀律嗰亭人，我相信運動，早睡早起𠵱家就越嚟越難，早起就係，早睡就難少少囉！何況年紀越大，我𠵱家自己一個人，如果我健康唔好，我諗嘢就更加負面，所以我覺得健康係好重要！」
人老心不老，電影公關望着區嘉雯說，「我知你今日對鞋係特登襯過嘅！」優雅地老去就是這樣。