近月本總裁大量寫保險業政策漏洞，保監局選擇不回應，反而周圍問人本總裁係邊樹彈出嚟，真係完全錯重點兼令我心灰意冷；今個禮拜冇咁好氣，決定歇一歇唔寫保險。
港版國安法實施在即，相信唔少香港人感到灰心，覺得屋企已經變咗；喺呢個日日發生地震嘅地方，香港人除咗適應，基本上沒甚麼可以做。有人就鼓吹兌美元，或者開設離岸銀行戶口，本總裁覺得盲點頗多。
首先，由於本地利率比美聯儲目標利率為高，資金湧入套利；港元現時滙價處於強方，表面上係兌美元最好時機。但如果大家冇實際用途，純粹心理上覺得要將所有港元兌換成美元，除咗輸換滙差價，仲有存款利率差額，一年期計大約0.5%同1.5%嘅分別。另一樣係，《蘋果》早前訪問一間找換店老闆，有個客人真係拎床下底港元出嚟換美金，連橡筋迹都仲喺銀紙上；到最後呢筆錢究竟係咪去返床下底，甚至係存入銀行或保管箱，一來一回，財產嘅保障程度會否因為咁而提高？
熟悉本地聯滙機制嘅人，都知道港元背後有同等價值美元back up，而且金管局手上持有外滙儲備達4,000億美元，係基礎貨幣最少兩倍；聯滙制度呢一刻係非常強韌，確保揸港元同美元分別不大。除非共產黨認真想徹底摧漽香港，否則不會貿貿然搞聯滙。
咁有人話共產黨未來會充公港人資產，所以換美元只係第一步，同時要申請離岸戶口（offshore bank account）。中共魔爪當然係風險，但大家亦要注意資產離開香港後，去下一個jurisdiction亦有風險，當地嘅法例係點？有冇存款保障？天災、戰爭、政治風險會否比香港更高？
市民現時傾向去花旗、滙豐呢類大行開設離岸戶口，貪佢哋喺某啲國家有fast track，例如英國、新加坡等，呢啲都可以理解；但有人提倡放券商甚至係逃稅天堂國家，除咗上述風險，被黑客hack嘅機會極高，個人資料保障亦成疑。要提醒大家就算對香港幾失望都好，金管局嘅金融監管，喺世界而言算係數一數二。
當然如果大家只係想對呢個無能政府表態，本總裁認為呢個原因好valid，繼續沽港元就好，最緊要大家開心。
程總裁
http://b.com/IFC89