【本報訊】特區官員、建制派統一口徑稱「唔驚」美國總統特朗普聲言制裁、啟動撤銷香港特殊待遇，但代表商界的自由黨立法會議員鍾國斌指，令他憂心的是若特朗普「夠膽郁聯繫滙率」，拒絕用美金與香港結算，屆時香港可以「即刻冧檔」。鍾國斌坦言特朗普「癲癲哋」，難以說定是否會走到這一步。
鍾國斌昨在商台節目指，無預想特朗普「一行就行到咁大步」，令他擔心的不是關稅，而是美國會使出金融政策的招數，「呢招殺傷力好強」。鍾指特朗普為求連任甚麼也夠膽做，如果他「夠膽郁香港嘅聯繫滙率」，效果勢必震撼，「佢（特朗普）絕對有咁嘅能力，尤其係如果所有結算要經美金，佢唔同你清、去clearing（清算），香港可以即刻冧檔，係咪可以去到咁極端呢一步呢？真係好難講，睇吓特朗普覺得取消香港特殊地位係咪到效，如果收效唔到，可能出啲更嚴厲嘅招數都唔定，我哋唔希望見到」。
兌美元受限 打殘金融業
資深投資者林一鳴認為，《美國──香港政策法》其中一個重點是港元可無限量兌換美元，令港幣可成為國際貨幣，若聯繫滙率取消，兌美元將受限制，對本港金融業帶來致命打擊，例如企業不再來港IPO上市，因為日後持有港元並不可隨時兌美元走，投資者亦不會來港投資基金和股票。
■記者姚國雄