多時不見嘅馬主H，在歷山大廈COVA餐廳外撞到左丁山，以為講一聲Hi就拜拜，畢竟大家曾在沙圈碰頭，但幾年來都未試過坐埋吃一次飯，唔係幾熟也。點知馬主H拉住左丁山問：「有冇手機號碼，我WhatsApp你。」咁講法，唔通唔畀咩，只係順口問多句：「你隻馬下星期三跑啦，有冇機會？」馬主H話：「到時問練馬師意見，再講畀你知。」
第二日，真係收到馬主H短訊噃，不過唔係賽馬貼士，而係講國安法。唉吔，睇怕呢次中聯辦係全方位動員，唔通係商界人士唔睇林鄭，索性由人大政協開始，一個傳一個，全力推廣國安法，竟然搞到平時講英文多過講中文，甚為低調嘅馬主H都要做「廣推」，傳遞有關國安法訊息。
馬主H段短訊講乜呢？係轉發嘅，不知原作者是誰，主要內容係：
（一）知情者透露，中央此際出手，係要快刀斬亂麻，在九月立法會選舉前辦妥，趁美國11月總統大選，特朗普有所顧忌，華府不敢對中國出手太狠，以免傷及美國經濟，拖累選情。
（二）在九月前出手，係因為去年區議會選舉，中方和港府誤判選民會憎厭暴力、示威，建制派只會輸掉部份議席，但仍能保持過半優勢，點知道竟然慘敗，建制派候選人全面崩潰，導致中聯辦港澳辦要大改組。今年九月決不能再輸，一定不可以出現立法會淪陷的結果。
（三）消息指港版國安法出台，一來打擊反對派背後頭目，二來DQ違反國安法的候選人。
（四）消息指任何候選人如「政治攬炒香港」，講港獨，到外國要求制裁香港等，將無法入閘參選立法會。
（五）美國制裁方面，消息人士透露，美英其實早就收到風聲，知道北京會在人大政協兩會期間出手，或會用「香港人權與民主法案」制裁香港，香港政經必定震盪，重新出發。
睇完短訊，急忙問馬主H：「傳畀我有何意思？」馬主H回答：「人地傳畀我，叫我廣傳，咪傳畀你囉，其他嘢我都唔知，你估我好想講政治嘅咩！」人在江湖，身不由己，好難講，馬主H係富豪一名，相信上述信息已在富豪圈子中傳開晒，國安法急於出籠，係要保立法會選舉勝利，不能讓泛民得逞。至於香港選民點諗點做呀？難以預計，總之各位在九月一定要去投票啦！