不少人指Vicky貌似歐倩怡，身形同屬嬌小玲瓏，她聞言笑說：「我又冇特別感覺，但都多謝大家，佢又靚又叻，又有咁幸福嘅家庭，希望我將來都係咁。」
問到有否考慮過選美？Vicky即耍手擰頭說：「完全冇諗過，我一心只想做記者，有團火想揭露真相，我份人好有使命感，細個曾經想做消防員，無奈唔夠高。救護員都有諗過，媽咪見我有使命感，叫我讀新聞去做記者，覺得我好適合。」Vicky自認「捱得」，甚至被人形容為「男仔頭」，的確天生適合做傳媒四出採訪。
Vicky現時單身，對上一次拍拖已是兩年前，男友並非從事傳媒行業。至於擇偶條件，Vicky含羞答答地說：「鍾意啲男仔搞笑、轉數快，唔好問一句隔10秒先答一句。外貌我又冇咩特別要求，不過啲朋友話我鍾意啲眼細細，咁又係，對方一笑對眼變咗成條線又真係好可愛。」