無綫財經台前主播李穎琳（Vicky），最近離開她形容的「comfort zone」往外闖。回顧效力7年的舊公司，Vicky初期亦曾任新聞主播，坦言近年對公司選取某些新聞角度不太認同，亦戥慘被外界針對的前線採訪戰友不值。Vicky形容無綫既是木人巷亦是傳統名校，雖從中獲益不少，但眼見公司近年的立場和限制，令她更嚮往出面世界的自由。
撰文：寶妮
攝影：陳俊強
現年30歲的Vicky上周約滿正式離開無綫，下月即轉投資產管理公司出任「IR」（Investor Relation）：「仲後生，成本低，世界咁大，與其坐喺TVB睇外邊世界，不如自己去探索。」近年不少無綫新聞主播離巢，皆因跟公司政見不同，Vicky是否也因此離開？她只說：「公司有自己立場，但有時見到都會諗點解公司會用呢啲角度，係有少少唔認同。」
做開荒牛踩18個鐘
2012年Vicky初入無綫任新聞主播，後來被調往主持《創富坊》，開始接觸財經，但2014年她因想做港聞而跳槽亞視，可惜及後亞視「無糧出」，剛巧無綫開財經台，同年她又重返舊公司。前後合共效力無綫7年，Vicky回想當日做財經台開荒牛最難忘：「因初時唔夠人，試過返0500至2300，第二日又返0500，你知股票嘅trading hour，做完直播又做專訪，嗰時真係幾辛苦。」人多是非自然多，但Vicky在無綫時跟同事相處融洽，又得上司伍嘉文照顧，當中跟前新聞主播陳嘉倩最為老友：「大家都鍾意貓、扮靚同煮嘢食，所以特別投契，嘉倩有同我講𠵱家接工作嘅心得，佢好支持我離開，話跳咗出嚟先發現世界好大，唔應該將自己困喺一個地方。」談到做新聞及財經的分別，Vicky表示：「新聞主播嘅稿有專人搞，但財經主播真係一腳踢，由呢一節我要講邊隻股，內容全部自己度，唔係人哋畀稿。」做財經新聞亦要跟時間競賽，Vicky謂：「呢節未排完講咩就要入廠，跟住同嘉賓交流嘅時候，其實我哋已經搵緊料，甚至有啲出街嘅graphic都係自己搞。」雖辛苦但卻有超大滿足感。
在亞視的日子，Vicky有不少第一次：「始終亞視人手唔夠，入去冇耐就要出席media lunch，呢啲通常都係派senior或首席記者去，同埋人生第一次出trip都係喺亞視，去大陸黃山，點知去到落雨行雷，纜車停晒，上到山頂已經天黑，白白背住啲腳架器材上山，但其他行家就識得畀當地人運上去。」日子雖短，但仍體會到亞視的人情味。Vicky坦言起初完全不懂財經，自行惡補，直至現在成為朋友眼中的專家，朋友亦會問她攞「貼士」。至於自己的投資策略，Vicky謂：「我唔會玩啲高風險，最多玩正股及藍籌股。同埋會分散投資，買一啲保本啲嘅高風險，我唔鍾意炒賣。」
「可能去街都會驚」
近年無綫因新聞報道偏頗被形容為「紅媒」、「CCTVB」，Vicky有感而發：「都有唔開心，主要戥前線同事唔抵，佢哋好辛苦去拍最真實嘅一面返嚟，盡咗本份，但無奈返到公司有啲嘢未必係記者控制到，佢哋都會唔開心，我好彩做財經冇政治嘢會好啲。」她坦言有聽過部份前線同事吐苦水。那麼Vicky眼中無綫是一間怎樣的公司？她想了很久才說：「TVB係木人巷，訓練好多人，我亦學到好多嘢，佢似一間傳統名校，始終有自己立場同好多限制，而我就鍾意自由一啲，隨心所欲。」
眼見去年的逆權運動發展至今，有否再燃起當初做記者的一團火？Vicky直言：「梗係有，每次社會事件比較多嘅時候，我就好想親身走到現場報道最真實嘅一面。」對於香港近年發生的社會事件，Vicky坦言很傷感，感覺社會現時有很多限制：「可能去街都會驚，以前細個唔會咁諗。希望香港快啲回復，同埋事實唔好再被歪曲。」