全國人大噚日下晝要通過港版國安法，777為咗表忠，所以喺特首辦主任陳國基陪同下，戴住底褲口罩靜雞雞去咗轉北角，喺工聯會搞嘅「香港各界撐國安立法聯合陣線」街站簽名，實行用行動撐港版國安法。
佢簽完名後仲揸咪喺街頭廢噏，話過去一年北角街坊唔敢落街，因為驚被人私了喎！不過，呢啲唔係八方見到嘅重點，反而家陣明明限聚令仲生效緊，當民主派組織派口罩都會被PoPo亂罰2,000蚊，但777可以公然喺街頭同超過八個人群聚，現場嘅警察一直當無到囉。PoPo之首PK鄧曾經講過「犯法就係犯法」，但原來有共同目的撐國安法就可以係例外？
睇番條599G法例，獲豁免群聚之一只係「為執行政府職能而進行的群組聚集」，777私下簽名撐國安法，點都講唔上係執行政府職能，更何況工聯會唔係政府一部份，所以777唔只自己犯法，仲身體力行支持違法行為。再睇番呢幾日，佢個班子成員其實更早就參與其中，公然全力助長呢股無視限聚令嘅歪風。