何韻詩、黃耀明、周博賢及舒琪等藝文界工作者，昨日在港版國安法通過前，在灣仔舉行記者會，講述藝文界的立場及公佈後續行動。何韻詩指港版國安法並非只是「黃色」藝人才憂慮：「你見到成個主流文化，無論電影音樂，『寒蟬效應』已經去到一個好得人驚嘅程度，所有歌手、導演、演員大家連去like一張相都要諗過度過，更何況要唱一隻歌、去拍一齣電影？點樣做？真係睇唔到點樣做。」她亦提到去年已聽聞到內地發展均要簽協議書。阿詩希望稍後作多些歌來鼓勵同路人：「因為嗰樣嘢（歌）其實係一個精神嘅力量，用各式各樣嘅藝術方法去紀錄或去團結我哋嘅力量。我希望自己做到之餘，亦鼓勵所有喜歡創作嘅人去做。」
阿詩形容港版國安法通過只是政府將所作所為搬上枱面：「真係所謂嘅『攬炒』，所以我個人就唔會特別做啲乜嘢，例如走，第一日行出嚟其實預咗去到呢一步。」阿詩坦言港人已不斷受打壓，當日在台灣被襲後，她已深信自己已在黑名單之內，被問會否擔心立法後可能被捕，阿詩坦言已見到很多例子，包括林榮基被綁架等，大家要正式面對「戰爭」的來臨，共同抗爭。
韓國開始有壓力
周博賢指上周已有過百名藝文界工作者發起出聲明，四日內已有超過1,600人簽名支持：「我哋唔係杞人憂天，如果作品中有『火魔』或『裝修』字眼都怕被指係煽動活動，又或參加演唱會中，有人唱出港獨、台獨或疆獨內容嘅嘢，我哋係咪都鼓吹參加分裂國家活動呢？」周博賢又表示希望在槍口前把握時間做「遺作」：「遲啲會唔會再聽唔到一啲《願榮光歸香港》，可能要聽陳偉霆嘅《野狼Disco》，呢啲廣東話唔啱音嘅歌，好似嗰啲《再出發》，只有呢啲歌。」
黃耀明指本月18日光州事件40周年，林夕填上廣東歌詞的《1987：逆權公民》片尾曲《自由之夏》，他負責唱廣東話，之前已想找韓國歌手合唱或願意出現在MV的人：「唔少人已開始驚，暫時未有人肯應承，呢件事由韓國藝文界發起，我哋本來係幫佢哋去完成件事，港韓兩地合作，但寫出嚟後，韓國嘅人開始感覺到壓力。」立法後會否怕秋後算賬？黃耀明指由雨傘運動時已有心理準備：「要驚唔係今日先驚，不過嗰種恐懼將會蔓延到整個社會，我諗好容易會思想犯罪、言語犯罪，呢個係關乎到每一個人。」他又指自己以往不少歌曲也很「踩界」，相信立法後便不能再唱。
六四窗口點燭光
此外，黃耀明亦覺得港版國安法是白色恐怖：「法例可能唔止係行動，活動都包，即係話如果啲觀眾去睇一個演出，台上嘅人講咗一啲嘢，就連睇嗰個都會被牽連，所有人都可能唔敢睇我哋演唱會，因為入咗嚟就一定好危險。我覺得中共真係要反省，佢係將歷史拉返去文化大革命、秦始皇焚書坑儒，我覺得邊個人去決定撳呢粒掣要去立呢條法，佢哋將會係歷史嘅罪人。」今年首次沒有「六四晚會」，會否擔心今年可能是最後一次「六四」？舒琪謂：「如果呢樣嘢唔可以發生，全香港喺呢一晚都有燭光，每一個家庭、每一個窗口都有，呢個景象會唔會更加有震撼力。」
採訪：曹家誠
攝影：陳俊強