自實施限聚令，限枱令之後，餐廳生意大減，近星期限聚令放寬，可以八人一枱，餐廳生意立時好轉，門口恢復見人龍，問餐飲R係唔係生意好好多？佢嘆一聲話：「係好咗，但要有社交距離，一半枱封咗唔畀得人坐，即使現在全院滿坐，都係得番以前五成生意，有鬼用咩！」此言甚是，餐廳若要全面復甦，開始請番多啲人，要待到限聚令，限枱令全面撤銷為止。
馬會餐飲生意一向好好，沙田會所銀袋經常有會員等枱，就因為限枱令所致，上星期五，中環朋友在銀袋咖啡室等到悶，短訊問左丁山：「你係常客，今晚喺邊？」左丁山早知銀袋冇位，訂咗在凱旋廳食頭輪（六點半至八點），叫呢位年青朋友C上嚟傾幾句，朋友C話咁快就上到三樓講：「老婆同仔女在二樓等位，傾幾句都好。」講到老婆，左丁山靈光一閃，問佢：「醒起嘞，你太太在中資機構工作，駛唔駛九月助選？」朋友C話：「咁嘅問題你都會問嘅！梗係要助選啦，老婆上司好緊張呀，早已落柯打叫佢地幫手叫相識朋友登記做選民，匯報泛民當區競選動態……」中資公司係做生意嘅，乜變咗做大型助選團？使乜咁驚呀，今年九月選舉前，已有國安法，選舉主任大把憑fb、IG、報紙言論，援引「外國勢力」為理由，大力DQ泛民候選人，黃之鋒等眾志小子，唔駛慌過到選舉主任呢一關。朋友C話：「係會DQ候選人，但怕掛一漏萬，走漏幾件素人畀佢地入到閘，可能變成葉傲冬翻版吖嘛。」葉傲冬在油尖旺區輸畀一個極普通平民，直情係中聯辦痛心疾首之事，今年九月不容歷史重演。今年有國安法助選，建制派預期必勝，一雪一九年七月區議會大敗之恥；朋友C講：「諗就係咁諗，但為防萬一，全港中資收到勸喻，全力助選，要選票一票不漏，確保泛民不能在立法會取得35席。」不過嚴防泛民偷雞取勝之餘，中聯辦其實都要督促御准參選人爭吓氣，好似體育界咁，馬逢國傳言退出，由霍啟剛補上，但霍啟剛父親身為足球總會會長，畀審計署批評成年唔出席足總會議，幾冇面呢？」朋友C反而哈哈笑，話：「霍公子唔開會無關大局，體育界一定投票畀霍啟剛公子，個個體育會都係霍家fans！」在香港做功能組別選民真容易，唔駛思想，總之聽到一聲令下，就投某人一票，泛民點會有機會反勝吖。