隔牆有耳:五星網軍喪搜反對1票 田二少躺着中槍 - 李八方

隔牆有耳:五星網軍喪搜反對1票 
田二少躺着中槍 - 李八方

全國人大噚日以2,878票贊成票,高票通過港版國安法草案,呢個完全唔令人意外,但最奇係表決結果出現一張反對票同六張棄權票,仲有一個人冇㩒掣。

指控「03年反23條」

原本人大表決一向多多少少有啲反對票同棄權票,但今次中共傾全黨之力,講明叫班港區人大政協要冇雜音,而且仲涉及國家安全,有乜理由唔係全票通過,而有一票反對同六票棄權?反對票來自何方神聖?坊間議論紛紛,港區全國人大代表、立法會議員田北辰立即成為內地網民同部份台媒眼中「首席疑犯」。

追查因由,可能田二少日前受訪,話草案內容入面,將禁止危害國家安全行為加上「及活動」三粒字有保留,所以好多內地網民聯想到佢身上,發帖炮轟二少,仲撈亂佢同大佬田北俊,連大少2003年反23條立法都入佢數,台媒仲一口咬定係二少投反對票。

呢個唔知係光環定死貓,真係可大可小,八方梗要向二少求證,佢以英文訊息答:「No I did not...Sorry to disappoint you」。佢接受港媒訪問,更講明投咗贊成票,咁八方都信二少唔會咁易走去投反對同棄權。

至於冇㩒掣嘅「遊魂票」,究竟又係邊個?內媒評論話因電子表決,有可能會出現未按表決掣或按表決掣過輕所以冇反應或按鍵失靈。其實人大投乜票,邊個投反對同棄權票,北京一定知,有人仲夠膽咁樣投,呢個先最有趣。

李八方