立法會昨日就《國歌條例草案》恢復二讀辯論，網民為阻惡法，於網上發起包圍立法會，亦有網民發起「大三罷」，呼籲港人罷工抗爭。阮民安（Tommy）昨早上帶多箱飲品上街，準備派給同路人飲用。不過Tommy遭警方截查，他將自己出現在無綫新聞及日本電視台的畫面上載到網上，爆粗鬧爆：「又X盤我，咁盤完就梗係要放我啦！行街食早餐，又唔X得？」
Tommy以短訊回覆《蘋果》：「泊低咗架車，之後俾個停車場阿姐點咗我行一個佈滿黑警嘅出口，黑警要睇晒我身上可以擺到嘢嘅袋，有個大Sir就問我：『點呀，你都嚟咗，係咪一陣全部都會出嚟㗎啦？』我話『唔知你噏乜喎，我好肚餓行街食早餐咋。』」他又指警方：「有問我拎電話睇，我話梗係唔得啦，有私隱㗎嘛，係咪今朝俾人fake到short咗呀！」
阿澤梁祖堯罷工
黃耀明昨日在社交網貼立法會外架滿水馬陣的相，留言：「水馬之城：你有見過一個永遠躲在黑警與水馬後面，咁怕面對人民嘅政權嗎？」他還上載一條沿路站滿警察的短片，狠批：「與民為敵的政權。」
杜汶澤的網台「喱騷」昨日則宣佈罷工：「由於節目調動關係，加上今日一大朝早就黑警圍城，搞到大家冇乜心情，CEO又偷懶，無端端話唔想返工，原定今晚9點直播節目《Late Show》將會暫停一晚。」梁祖堯昨日也在Ig宣佈：「527休息一天！」
王貽興則在fb貼出身着黑tee的背影相，衫後印有「波大比人揸，人善比人蝦」十個字，他留言：「今日出唔出，冇人可以阻止，出咗亦可能改變唔到啲咩，但係無論發生咩事，大家都要平安返屋企，留有用之身等睇派彩，等待最黑暗過後嘅曙光。」
藍奕邦堅持留港
藍奕邦昨日凌晨在社交平台貼文，他說：「呢幾日喺度諗，可能就快冇得再喺香港寫我想寫嘅歌，冇人敢搵我寫歌，冇人敢搵我再唱歌，我嘅作品全線成為禁歌。」但他決定暫時不走：「如果有一日我感覺到人身安全成問題我就會走，否則，我想留喺香港，同香港人齊上齊落。」
採訪：皓騫