一位北角城市金庫劏場業主計劃移民，放盤4個月，叫價已比買入價低50%，仍無人問津，老友轉介給我搞掂佢，心諗搵着我來搞。當初以低入場價「笠客」，又用首2或3年保證回報轉移視線呃住先，都知道，劏舖又好，劏廠又好，劏的，其實是小業主。
因果，真的，昔日「笠客」，今日幫手出貨。僅僅幾十呎，可以幹甚麼？搵品牌，不了。搞主題商場？傻了。奉勸他壯士斷臂？衰過唔答，因為該場最近成交價已經較買入價蝕讓逾八成。出租？有客到，不是說笑，他們有機會租作迷你倉，不過建築呎租低至30元，建築50方呎，月租1,500元，用當天買入價約250萬元計，回報率0.72厘，應該夠交管理費。
太陽底下無新事，逃生兩條路，一是要貨唔要錢，全場業權繼續分散，有人選擇壯士斷臂，有人選擇每月取丁點租金奢望守得雲開見月明。二是要錢唔要貨，集合業權，將幾十呎單位打通擴大面積，搵穩定或有品牌租客，或搵買家接貨。
真有潛在買家？講真耶穌真會打救世人，如果集合到業權，面積有番5,000至6,000方呎，有宗教團體like㗎！宣道會不就是附近一個商場的業主嗎！希望可以同時解答上期稱手持劏房倉讀者的問題啦。
小師兄
http://fb.com/siuching28
本欄逢周四刊出