民建聯主席李慧琼早前喺立法會保安同建制派聯手下，「奪權」搶佔內務委員會主席，咁就可以喺立法會主席梁君彥喺大會行開行埋時做大會嘅代主席。立法會噚日開會，李慧琼自第二項質詢開始以代主席身份主持會議，喺佢嘅「英明」主持下，民建聯壟斷大部份發問機會，就連同為建制派嘅謝偉俊都提出質疑，要求主席注意吓，點解講嚟講去，都係同一政黨？
謝偉俊不滿 要求「暢所欲問」
李慧琼噚日喺大約12點開始，接替梁君彥主持會議，當時正由建制派廖長江就本土恐怖主義問題提出質詢，經民聯林健鋒、民建聯何俊賢都有份就有關議題跟進；之後有關記者採訪工作嘅質詢，亦都有超過十位議員輪候發言，不過李慧琼就將提問嘅機會，分配咗畀民建聯葛珮帆、黃定光同蔣麗芸，其他黨派嘅建制派議員全部冇份，泛民想問問題？更加冇機會。
點知連謝偉俊都睇唔過眼，用規程問題反映不滿，佢話對於重大問題，好多議員都想提問，質疑點解三個發問嘅議員都係嚟自同一政黨，又要求代主席喺邀請議員發問方面做好啲，令大家「暢所欲問」。黨友之前咁落力幫忙搶攻內會主席喎，家陣坐正嘞，李慧琼報恩畀黨友講多兩句，又幾出奇？