繼法國電視第七台《28分鐘》公然力挺香港巴絲，翌日第五台晚間清談節目以強推港版國安法為題，也罕見地不帶雜音，四個出席嘉賓一致認為中國破壞一國兩制態度粗暴，內憂外患之下不惜鋌而走險，極可能搞到玉石俱焚。這真教人跌眼鏡，事關法蘭西親中陣營向來人頭湧湧，不論出於幼稚浪漫抑或睇錢份上，但凡中國議題擺上枱，都不乏支持者慷慨護航，遠如文化大革命，近如反送中，總響起「東方紅太陽升」的肉麻讚歌，暫時忘記大言不慚的民主自由，義務替極權粉飾門面，法文版《毛語錄》曾經一紙風行，被一帶一路牽着鼻子走的傻逼不計其數。如今風向一百八十度扭轉，當然是武漢肺炎的「功勞」，數月以來嗌交戰狼不斷展開攻勢，發言的是華大媽又好王大叔又好，咄咄逼人的嘴臉既惹鬼佬反感，一味諉過一味恫嚇也乞人憎，企圖補鑊的口罩外交結果更衰多鑊，救世主公關策略一敗塗地，關公顯靈都救唔番，見慣大場面的時事評論員眼睛雪亮，真係信你至有鬼。
作為外國勢力，法國不及美國具威脅性，但他們這些被嘲長期駐守象牙塔的左膠，發圍倒的確字字鏗鏘，而且畢竟有悠久歷史墊底，宮闈鬥爭連續劇耳熟能詳，「你咪以為習近平要風得風要雨得雨啊吓，黨內其實好多人睇佢唔順眼」這種觀察，沒有經歷過朝廷風浪的美洲新大陸國民就完全欠缺。瘟疫的洗禮，令中國式幻想徹底破碎了，那場連演三日三夜的足本《牡丹亭》，不過是湯顯祖閉門造車，夢中的亭台樓閣再精緻，步出戲棚立即灰飛煙滅。