有人話女人比男人較容易喺娛樂圈發圍，因為男人如果唔靚仔，又唔夠實力嘅話，喺呢行好難搵到機會。但女人就唔同喇，如果有少少姿色，就算演技唔係咁好，甚至係完全唔掂，只要有人關照，都唔使怕冇嘢撈。好似入行多年嘅「瘦骨仙」，對於Jessie嚟講，佢啲戲可以話係零演技，亦唔算好有觀眾緣，但係到今時今日都未消失，當然有瘦骨仙自己嘅辦法。
揀男友博上位
有人同Jessie講，瘦骨仙係一個超級進取嘅人，身邊識嘅人無論男男女女、瘦骨仙只要覺得「有價值」就會埋堆，如果唔係佢就一定唔會浪費時間，揀男朋友就更加唔使講啦，如果唔係之前都唔會揀個完全唔襯佢嘅電影人拍拖，只係估唔到對方喺行裏面嘅地位，都幫唔到瘦骨仙啲乜，當然佢最後係速撇啦。
不過，瘦骨仙唔單止對男人係咁，身邊好多女性朋友都係一樣，最初真係當瘦骨仙係好朋友，但後來先知佢同自己做老友，原來係有目的，就係睇中咗自己嘅公司，希望可以透過自己介紹公司大老闆畀佢識，當知道好友滿足唔到佢，瘦骨仙就即刻同人反面，仲要反客為主鬧人，又話人哋無義氣，真係服咗瘦骨仙。其實呢個圈係圓嘅，如果繼續咁樣做人，都唔使好耐就玩完！
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
