球壇停擺大約兩個多月，唔少球員雖然留喺屋企個人訓練，不過佢哋屋企就算幾大，屈埋屈埋始終爭啲，結果唔少球員一返球會復操就隨即受傷！瑞典神鋒伊巴謙莫域喺周一疑似觸傷阿基里斯腱，好在最後都係虛驚一場；而「新C朗」祖奧菲歷斯亦拉傷咗左膝韌帶，好大機會缺席西甲復賽後嘅第一場波；至於維拉利爾守將拉美路富尼斯摩利，更加喺操練時右腿肌腱斷裂全季報銷，睇嚟各位球星近排復操都唔好去到咁盡喇！
居家訓練後遺症湧現
早前已經有唔少專家警告，球員居家訓練嘅成效存疑，已提醒球員復操或復賽後要小心。其中最早復操嘅德甲，月初多蒙特即有三名中場韋素、尼高舒侯斯同安利簡恩喺訓練時拉傷。之後復操嘅意甲，拿玻里大將文奴拿斯同法比安彭拿同告肌肉受傷。結果去到周一球壇再傳嚟壞消息，兩個星期前先返到米蘭、自我隔離完後復操冇耐嘅38歲前鋒伊巴，喺練習賽中射咗一腳波後，小腿疑似整親仲好痛，結果要醫療車送返更衣室，外媒形容好可能係跟腱位置重傷，伊巴隨時會長期缺陣或收「咧」；好彩米蘭禮拜二發聲明，話伊巴只係小腿肌肉受傷，但預計伊巴都要休息一排。
同日西甲亦傳嚟兩宗受傷報告，其中有「新C朗」之稱嘅菲歷斯，喺周一訓練時不幸扭傷左膝韌帶，立即要送院檢查，西媒估計佢要休息三個禮拜，好大機會趕唔切西甲六月中復賽嘅首輪比賽；另一位西甲球員仲慘，講緊嘅係維拉利爾後衞摩利，上周四操練時受傷後，周一就證實右腿肌腱斷裂，今日會喺巴塞隆拿做手術，養傷至少三個月，肯定缺席餘下球季。
球員除咗唔習慣突然加操，狀態未起就急急出戰，亦有機會增加佢哋受傷嘅風險。德甲重開後首輪比賽，就已經有八宗肌肉受傷嘅情況，前阿仙奴物理治療師加利利雲就警告：「以往季前會進行幾周輕度訓練，然後會踢友賽，可以有6至8星期時間等球員慢慢適應。但𠵱家佢哋只會喺公園跑步，然後因為要保持社交距離之下復操，唔會有踢友賽嘅碰撞，所以到正式比賽就好易令肌肉受傷。」
意甲踢晏晝收買人命
目前已經有唔少肌肉受傷個案嘅意甲，仲計劃將比賽安排喺炎熱嘅下午上演，就遭到唔少球員鬧爆，其中布雷西亞隊長加斯達迪路話：「已經要踢咁密集嘅比賽，仲要喺高溫嘅下午踢，實在令我好反感！賽會呢個安排只會令球員冒更大嘅險。」睇嚟喺各大聯賽重開後，球員受傷嘅情況好可能比以往更加多同更嚴重囉！
