五月初，收到一篇藍絲轉發嚟嘅文章，講及舊人舊事，舊人與葉漢良有啲關係，於是又轉發畀佢睇吓。葉漢良近十年已是隱居山人，除咗晚上有出城教紫微斗數及葉氏玄學理論之外，極少出現社交場合，左丁山同佢有六七年未見過面咯。
點知葉山人竟然有回覆：「舊文N年前寫的，nobody cares，原作者近期有很多騎哩怪文，」咁講法，舊文再翻傳，有何意思？於是問吓「報業歷史」專家鄭明仁，老鄭回覆曰：「不足一觀，抽肥佬黎水啫。」好多藍絲想肥佬黎玩完，近日有國安法出台，又周圍發文話《蘋果日報》即將被國家力量摧毀，危在旦夕。套用特朗普口邊一句：「We'll see!」。
見葉山人肯賞面回覆，打蛇隨棍上，約佢食午飯，佢話「辛苦啲噃，朝早起唔到身。」於是將午飯時間訂在下午一時半，免佢交通需時，左丁山由中環走返去沙田食，去邊呀？想起沙田第一城附近有間帝逸酒店（Hotel Alva），已經重開中菜廳，總廚梁師傅有新意，於是請總經理Simon哥安排一張四人枱，搵埋大編輯一齊去與葉山人傾餐飽。
葉山人屈指一算已知呢間新酒店在那裏，兩點前揸車駕到。是日呢間酒店嘅西餐自助餐已滿座，中菜廳仍然靜英英，Simon哥索性安排我地坐在私人房間內，享受梁師傅之美食；葉山人吃得開心，同我地講中國歷史，講到五代十國之南漢時，皇帝要所有大臣自宮，以顯忠心，居然有好多讀書人貪圖俸祿，自宮求一官位。左丁山不知有呢段歷史，聽到甚為震驚，想起古人不為五斗米折腰者，肯定係絕對少數。一路聽葉山人講歷史，講哲學，聽到近四點，先至記得另有事要辦，於是埋單，順便問葉山人：「今年點睇？」山人話：「我唔係玄學KOL，你自己小心風浪啦！」
5月23日蘋果有葉漢良專欄講「中國式割禮」，有講及南漢士人自宮之事，「有自宮以求進者，亦有免死而宮者，由是宦者近二萬人。」有無限感慨，漢武帝判司馬遷死罪，後以腐刑（閹割）代之，料不到約860年後，南漢竟以士人自宮為晉身條件，又隔1000年後，中國又有老毛蔑視鄙視讀書人為臭老九，欲求存者莫不寫悔過書，接受批判，形同自我掌摑痛哭、叩頭，向黨表忠，抹掉自尊，精神自宮。
5月21日北京宣佈在港實施國安法之後，全城藍絲歡欣莫名，黨媒刊登近60頁支持擁護廣告，藍絲群組紛傳好消息。內地微信有網民發表長文，要求實施國安法之時，奪回香港司法權、奪回香港教育權、奪回媒體權，而香港藍絲竟然喝采！葉漢良的「中國式割禮」一文，發佈得合時，昔之南漢，今之香港，自宮求榮，千年不變。