前日港島遊行，有Popo俾人影到知知法犯法，喺便利店冇畀錢之下強搶樽裝水，件事通晒天之後先有公共關係科人員返回「案發地點」補找數了事。事件引起各界議論紛紛，有律師仲認為即使其他人事後去便利店畀返錢，有關行為已涉嫌干犯盜竊罪。
仲有後數快同Ng 7 Pay
港人講地、facebook專頁「分貝」同「空姐牛肉飯」等藍絲平台po咗條片，話搶水事件30秒後已經有其他Popo代為畀錢，但傳真社發現，片中涉事防暴警拎咗支水走人後，的確係再有一名便衣警入便利店，但就見唔佢有畀錢，只係見到佢又拎水，而兩個Popo並非同一人，條片亦無法顯示便衣警有為防暴畀錢。
傳真社喺藍絲平台留言問佢哋會唔會將不實資訊影片下架，當然係冇回應啦。
好多網民發揮抽水精神，創作咗幾個Popo專用嘅支付系統，其中一款叫「之後補ASIRPAY」，特點係買嘢唔使畀錢，仲有「後數快」同「Ng 7 Pay」等等。咁着數？網民都好想立即裝，一嘗做Popo嘅特權滋味。但呢啲系統唔係一般良民可以擁有，點解呢？有名你叫「ASIRPAY」，正所謂「犯法就係犯法，除非你係……」
其實呢啲App都係網民苦中作樂，警察知法犯法，香港人奈佢唔何惟有幽自己一默，於是用大陸嘅「支付寶」做二創，惡搞咗「之後補」出嚟，仲要抵死到設計埋logo同宣傳口號「用之後補，飯聚無憂」。
李八方