武漢肺炎令全球經濟陷入困境，打工仔隨時加入失業大軍，尤其身為家庭支柱的中年男士，若被裁員更要想辦法搵收入，甚至馬死落地行轉行保家計。ViuTV於下月4日推出全新真人騷《中佬唔易做》，找來幾位無綫前綠葉轉行，包括敖嘉年、古明華、張松枝及麥長青等，當中，揸電單車化身為外賣仔的敖嘉年昨接受《蘋果》訪問說：「連底褲濕埋，真係忍唔住爆粗。」
面對逆境就要自強，ViuTV製作的12集真人騷《中佬唔易做》 將於下月4日首播，節目請來六位中年男藝人敖嘉年、古明華、張松枝、麥長青、袁富華及艾威，要他們試選擇重投另一個新的行業，紀錄他們期間會面對怎樣的困難。
學懂不停學習
現年43歲的敖嘉年在節目中負責揸電單車送外賣，昨日他接受《蘋果》訪問時說：「拍咗兩日，成件事係濃縮咗，要好快去pick up啲嘢，好似要點樣去接單，又要點樣喺唔抄牌嘅情況下去搵位泊車，係好緊張，不過真係好好玩。」不過他接着說：「但係真係好辛苦呀，生活真係好艱難，呢樣喺演藝圈未試過，真真正正唔係造馬，真嘅單，我吓吓都遲到。原來做人係要不停去學習，我試過揸住電單車，個電話冇電，睇住個電量係咁跌，嗰陣又落緊雨，我又要抹頭盔塊鏡，啲嘢又濕晒，仲連底褲濕埋，真係忍唔住爆粗。」
古明華怕人鬧
56歲的古明華則負責在家具店做售貨員，他說：「初初以為好簡單，覺得50幾歲人有乜嘢job做唔到？但點知真係好難，嗰種辛苦唔係可以想像到。」他更直言最怕偷懶被上司鬧：「返工嗰日，我由朝早9點企到夜晚8點，雖然冇乜人見到我靜雞雞搵位坐，不過始終除咗客之外，仲有老細睇住，唔通50幾歲仲因為呢啲嘢俾人抦？」有沒有想過真轉行？他說：「喺疫情之前係冇，因為太鍾意做戲，但係𠵱家覺得生活唔係咁狹窄，仲有好多選擇。」
52歲的麥長青（麥包）體驗揸貨車送貨，他指自己做得十分開心：「尤其呢段時間，好多行業真係冇得做，如果要即刻轉又啱自己性格嘅就係揸車，因為我鍾意四圍去，覺得好自由自在。」他指返工前要去上半日堂：「原來做呢啲都有好多竅門，要學點樣接單，原來部電話好緊要，你㩒遲啲，就會俾人搶咗張單，雖然我喺app揀啲唔使搬貨嘅單嚟接，但有次都幾驚險，因為有個外籍人士佢要攞貨，我唔識英文，佢又唔識中文，唔想塞住人我被迫要落車同佢搬貨。」但他指：「不過總括嚟講，我都唔覺得辛苦，其實我之前做過好多工作，包括賣魚蛋、跟車、地盤、清潔，我成日覺得做嘢要積極去面對唔好怨，多啲包容呢個世界美麗好多。」
張松枝亦指自己做得好開心，他在街頭推銷網絡訂購節目，雖然他有戴上口罩，但不少人都認得他，他說：「香港街坊真係好好，公司開頭以為我開唔到單，點知我6個鐘內開到四張單。」問到他要放下身段推銷辛苦嗎？他說：「做演員都係拋頭露面㗎喇。」
採訪：唐琛悠、翁可人
