踢緊西甲巴塞隆拿嘅阿根廷球星美斯，絕對係當今球壇嘅一代球王，細細個嘅佢已經好受球迷歡迎，好得人鍾意。最近網上又傳返喺2005年，18歲嶄露頭角嘅美斯，喺家鄉阿根廷參加電視台節目嘅時候，畀班主播上下其手嘅片段，嗰幾位仲要係男人嚟，真係慘慘豬！
主播狼相全程直擊
美斯喺04年10月首次為巴塞一隊上陣，被視為明日之星，佢獲邀請參加阿根廷電視台一個叫《Not 2 without 3》嘅搞笑節目，當時度過18歲生日冇耐嘅美斯仲一臉青澀，仲未上位成為球王，受到呢啲對待都唔敢出聲。喺節目期間，美斯不斷畀幾位男主持刻意咁摸下體，講講吓又將隻手放去佢褲襠；另一位主持趁住美斯同人攬緊嗰陣，仲大大力揸佢屁股；仲有位係咁搣佢塊面，攬住佢嚟錫，有一幕仲想除佢件衫㖭。雖然美斯不斷反抗，想避開呢啲行為，但始終都唔敢出聲講唔好。呢個節目嗰陣時喺阿根廷好受歡迎，專登安排喺黃金時間出街，仲贏埋阿根廷幽默大獎，但唔知呢啲性騷擾橋段到底係想惡搞美斯，定啲主持人真係咁鍾意佢就冇人知喇。節目喺冇耐之後就摺埋，希望美斯當年冇留低陰影啦。
32歲嘅美斯已經係巴塞icon，上年佢仲話過自己想喺呢到踢到退休，點知原來佢都曾經諗過走人，就係因為當年嘅逃稅事件，搞到佢想離開發展咗咁多年嘅西班牙。是咁的，16年夏天美斯同老竇被西班牙當局起訴佢哋涉嫌瞞稅，懷疑佢喺06至09年期間瞞稅超過400萬歐元，即大約4,200萬港紙咁多，真係一身蟻喎。但美斯就話冇咁嘅事，兼且快手還稅，但都係要搞上法庭，對呢位球王嘅形象都好大影響。
當年想走有價冇市？
美斯就話嗰陣搞到咁亂，佢真係想走，唔單止係離開巴塞，係直頭想離開西班牙呢個傷心地。佢覺得自己遇到唔公平對待，搞到佢唔想再留喺度，但係個個都覺得佢會留喺巴塞，根本冇人問佢價。外面嘅人唔知咩一回事，美斯啲仔女又仲細，嗰陣真係對佢同屋企人嚟講都好困擾。好彩𠵱家已經冇事，美斯亦已經返到巴塞復操，準備球季重開。