【黑鏡線索】
細個上EPA堂，課本會教，香港最勁嘅係有法治，有言論自由，三權分立，乜乜剩剩。呢啲詞彙當時會識背，又好似好容易明。一直都有，係一種明。有過但係而家冇咗，又係另一種明。好多朋友話，有過但逐漸失去，而家呢種感覺，係最難受。
中共引國安法入香港，一国一制正式開始。其實一国一制早已經寫喺牆上，今次只不過係直頭刻埋上額頭。當然會有人彈出嚟，包括啲過氣政界losers，話乜嘢一日都係你班友唔知碇，本來阿爺對大家好啲，而家搞到阿爺發火，先至有今日。
但事實係，中共由頭到尾，都係諗住收你皮。佢今日先想喺搞國安？上年已經搞送中啦。佢上年先想送中？03年已經想搞23條啦。就係反抗，先拖得到而家。
分別係，以前中共會扮嘢，扮係香港政府自己搞，跟足晒立法程序，你唔好理佢啲票點嚟，總之就係數夠票通過，話之你二百萬人上街反對，中共只係成全吓「主流港人」嘅意願。
而家呢，中共發覺，扮嘢成本，實在太高。如果跟足規矩，太夜長夢多，何況台灣選舉，經香港人向世界展示爛溶溶嘅示範單位，一国兩制徹底破產，仲扮乜鬼嘢。索性唔扮喇，用shortest path搞掂。
但shortest path係有代價。對中共嚟講，本來可以呃，就梗係好過砌。騙局要成功，首先係要被呃對象，本身就一廂情願，本身就想俾人呃。
存僥倖之心，係人性。希望五十年不變，就覺得會五十年不變。希望有兩制，就覺得會有兩制。希望有法治，就覺得法治未咁快死。
騙局變賽局 覺醒不存僥倖
就算中共做幾多動作，好多人都覺得唔係啩，唔使咁激動反抗呀，唔通宣佈一國一制咩，唔通中共真係攬炒咩。受害人自己不斷同自己bargain，騙徒根本唔使點用力。吊住被呃者嘅希望，係騙徒最大嘅武器。
香港人好多人喺反送中開始覺醒，反抗，焗到中共正式反枱。反咗枱，就再冇人有理由心存僥倖。唔使諗ifs，唔使諗when。我發覺，身邊唔少朋友，驚嘆完兩日，開始有股沉着面對嘅氣氛。
當你唔再俾騙徒吊住吊住，當你終於坦白面對形勢，騙局終於變成賽局，咁你就唔係輸硬，因為最起碼，你唔會輸畀自己。
Clarity is liberating. Let's make the most of it.
撰文：宋漢生
fb : sunghsblog