𡃁妹其實不𡃁妹。都35歲了，由入行被人叫「𡃁妹」叫了20年，李綺雯說：「冇乜所謂，𠵱家已經進化成為𡃁妹姐、𡃁妹姨姨、𡃁妹婆婆，我OK嘅！」
又一個因為政治發聲，而遭無綫雪藏半年，今個月正式約滿離場。其實𡃁妹就像大家在校園時，總有一個在班上的人物，不怕天高地厚，都要為同學出頭的人。
李綺雯不忘提醒記者，「其實你睇返，雨傘、鉛水、國教，我都有出過聲！」她不是衝出來扮黃攞光環的。
一路走來，始終如一。演慣人哋阿妹、小姐個丫鬟的她，現實在家中是「大家姐」，如今轉型YouTuber，終於可以自己做一次主角，又進化了。
李綺雯說：「可唔可以話係發聲呢？只不過我係講返一個真相，或者係一個公道說話！」大家姐上身，真相，不必看千頁報告。
撰文：文嘉龍
攝影：林德雄
我覺得唔能夠獨善其身
和無綫「因了解而分手」，李綺雯原先以為可以在電視台演戲演一世的，「我一直都好鍾意拍劇，可以嘅話，我係想可以做戲做成世，做到好似羅蘭姐咁，或者90歲都仲可以拍戲。」人大了，知道沒有寫包單可以打一世的工。「其實仲有其他電視台，或者唔喺電視台都得，只要一路有得做戲，我都覺得OK！」
打工如拍拖，知道唔夾，長痛不如短痛，而李綺雯與無綫不經不覺拍了14年拖才分手。「續唔續約，我覺得係雙方決定，大家都決定唔繼續咪分開囉！我哋大家都冇欠大家任何嘢，講真好似情侶分開，分開咪分開囉，又冇話邊個欠邊個，同埋一開始大家都知㗎啦！」知的意思，大概是無綫究竟是渣男定暖男，其實一早心中有數吧！
「好心分手」後，李綺雯曾說過，現在終於可以「講想講嘅嘢、做應該做嘅事」！單是這句，可想而知「拍拖」時期真係慘過坐監。起碼現在po張相寫句嘢，不會再有人溫馨提示不要再寫了，「佢哋有呢個溫馨提示，叫我哋唔好講呀！講真，我唔覺得自己講緊政治，有好多嘢睇你點睇囉，政治都係影響民生，你影響緊民生，即係你影響緊我嘅生活，點解我唔可以出聲？大家睇到好多嘢，如果個制度、政制做得好，香港問題會少好多，其實大家都知，大家唔願意去面對，唔願意講出嚟！」
當然李綺雯大可學人講句「我討厭政治」，5粒字講完，有幾難？但現實是你不找政治，政治來找你。「好多人都同我講，你做娛樂圈，你就真係做戲啦，唔好講任何社會上面嘅嘢！」
偏偏「唔聽教」，不怕講出口的李綺雯說：「其實電影又好電視又好，你講緊嘅嘢係同社會脈搏連繫，如果同個社會完全冇關，你嘅觀眾唔會有共鳴，你都要連繫人心，如果唔可以觸及內心，其實你拍出嚟嘅嘢唔會好睇，唔會令人感動。點解做電影電視要同個社會去切割，或者去抽離？好離地囉，我反而覺得做我哋呢行，當你面對自由被扼殺，當你面對言論創作自由被扼殺，應該更加行出嚟，我更加覺得我哋唔能夠獨善其身囉！」
只有良知係跟你一世
冇自由，還談甚麼創作？到時候，只得一種聲音，只能歌功頌德，隨時套套都是《我和我的祖國》。「娛樂圈要發展我哋嘅電影電視，應該面向國際，國際題材更加有國際性，而唔係單單咁向住一個國家去發展囉，我諗全世界嘅人口都會多過任何一個國家啦！好似韓國好多電影電視，點解會咁吸引，靚人靚景係其中一樣，其實令到大家有衝擊，往往都係一啲反映時弊時事政治嘅題材，可以牽動全世界！」相信政府！唔怕！
那些年的李綺雯，曾幾何時也想回歸祖國賺人民幣？「如果你話要發展埋內地市場，都會有諗，但唔係放棄香港市場，因為始終我都係一個香港人！（𠵱家呢？）𠵱家邊度會有呢個機會呀！哈哈！」怎會貿貿然送中呢！
反送中，一年了！李綺雯想着自己到底怎樣發聲，「其實我唔覺發聲過乜嘢，真係一個好簡單嘅感受。我有講過無論你食幾多着幾多，只有良知係跟你一世，你食嘅嘢，食完已經冇咗，但係良知喺你心入面，你做啲對唔住你良心嘅嘢，你一世都會受責備，你自己責備你自己。呢啲係耳熟能詳道理，唔係咩？好基本喎我覺得！」
但身處妖獸都市，好多基本人事物，都可以變得罕有。去年，李綺雯po了一張在連儂牆前留影的相片，「嗰時有藍絲喺連儂牆襲擊一啲黐連儂牆嘅人，我就覺得，其實連儂牆已經係一個最卑微表達嘅一個方式，冇聲、冇動作，淨係黐一張紙喺度，係因為我哋冇辦法去改變呢個社會，先會去做呢件事，咁都容納唔到，唔好話搣啦，要去襲擊，香港𠵱家變成咁？連咁樣嘅聲音都容納唔到咩？」
睇唔過眼就要出聲，李綺雯由細到大如是，小學已經常為班中同學出頭和老師理論，「我由細到大都係睇唔過眼就會出聲嗰種人，我印象中讀小學已經會同阿Sir、Miss講道理，我唔係搞事，我係同佢哋講道理，同埋我仲要係辯論隊成員，你畀一個題材我，我可以搵好多資料，唔係打嘴炮喎，係全部有論點有論據支持，我小學已經係咁！」小學我的志願，老師叫她去做議員，「小六去諗我嘅志願係咪太遙遠呢，我話真係唔知第時想做乜，跟住老師就話，我覺得你好適合做議員，由嗰時開始我就開始留意時事政制，所以細個成日都睇《頭條新聞》，一路去到中學，發覺做議員要識好多法律、政制，要讀好多書喎，因為如果我做，我一定唔會係建制派，我一定唔會一路開會一路瞓覺，或者叫人蒸口罩，我一定唔會係嗰種！我一定所有嘢都要有根有據，我就覺得好似有啲難，跟住就諗不如去做其他嘢，但係細個有老師啟發，真係有諗過做議員嘅！」
同其他細路仔有啲交流
誰知道議員做不成，做了女優。李綺雯2001年參加亞視女優選拔賽，令人最深印象是食蟲（龍蚤）出位，終成冠軍而入行。「點解我會入行？我小學嗰陣校慶要做話劇，阿Sir就搵咗我，有咗呢個經驗，升上中學就有劇社，因為我住屋邨，又參加埋社區中心話劇，嗰時我哋啲話劇好『細藝』，一個人可能幕前幕後乜都要做。去到中五就有《女優》比賽，因為佢係選女演員，佢唔係選靚，我從來冇諗過選美，因為佢講到明唔係選靚女，純粹係選一個藝人，我係一個鍾意做戲嘅人，我咪去試下，可能我細個冇乜形象，又夠豁出去，佢哋覺得我好投入呢個騷，好夠放，跟住就贏咗！」
李綺雯說，自己從來都是一個想清楚後果才去做的人，「我比較有主見，我所有決定都要我自己去搜集資料，去分析再做決定！我都會有感性一面，我睇戲每一次都喊，點解睇完首映我唔做訪問，就係因為每一次冇人喊嘅戲，我都會喊，我好容易影響情緒，但如果要做決定，我就會好理性，我唔會畀情緒導向。同我做嘢嘅人就會知道，對我嚟講，有乜問題發生，你講乜都係廢話，你淨係答我點樣解決，我會係嗰種人，所以可能同我做嘢都辛苦㗎！」非常不𡃁妹。
現在沒有大樹遮蔭，有前路茫茫的感覺嗎？「我覺得前路係點，係我哋自己行出嚟，所有路未有人行出嚟嗰時，都冇人知係一條乜路！如果你要搵一條新嘅路行，係艱難，但係唔行，你又點會知得唔得呢？」
這時候的𡃁妹更似大家姐了，勇往向前衝。「可能會有好多未知之數，可能會有人覺得，你都去到呢個年紀，唔好搞咁多嘢，安安穩穩就算，唔好浪費咗你之前嘅努力，但係我嘅諗法，我去到呢個年紀，我累積咗一定人生歷練，其實𠵱家更應該去做得更多嘢呢？我唔覺得只有年輕人先至無畏無懼囉，我反而覺得到咗我哋呢個年紀，應該更加清楚自己條路要點行，可以點樣行少啲冤枉路，甚至我哋可以同其他細路仔有一啲交流！」就是不要讓自己變成廢老！
35歲自稱單身很久的李綺雯說，「單身咗幾耐呀？耐到唔記得！好多人同我講，不如你搵個人嫁咗去啦，但係我又唔覺得嫁咗等於唔使做喎！」說到她之前的大隻緋聞男友麥凱程，最近也傳因抗爭被捕成無綫棄將，她只輕輕帶過：「緋聞就梗係假啦！」
識揀要揀手足做男友？李綺雯說：「要有良知囉，有良知係基本！」
【後記】曲奇餅變搓手液
藝人同素人在職場原來都冇差別，last day都係要派散水餅的。「最後係點？總之唔好執漏嘢，因為locker有好多嘢！可能我個人唔係咁形式化，有啲人要好儀式感重，離離合合對我嚟講，唔係一件咁大嘅事！」
大合照免了，但小禮物還是有，「我準備咗啲紀念品畀大家，準備咗酒精搓手液，其實本身諗住整曲奇餅，但係因為呢個疫情關係，費事做啲咁高風險嘅嘢啦，咁就決定送一啲酒精搓手液，貼咗貼紙就送畀大家，我諗呢段時間係最實際！」
人大了，不再𡃁妹時，選臨別禮物都從實際出發。
化妝：joew professional makeup
髮型：IG of Mandybeforu
服裝提供：sparkonlineshop
場地提供：Y Show Tasty