香港人正為港版國安惡法殺到要上街抗爭，點知噚日又傳嚟另一則令人傷感嘅消息，憑萌樣及圓潤身形俘虜唔少貓迷嘅尖東名貓「忌廉哥」，已經去咗彩虹橋，永遠成為佢班粉絲嘅追憶。「忌廉哥與忌廉家族」fb專頁噚日發文公佈忌廉哥逝世嘅消息，有逾4,000多粉絲紛紛留言悼念，仲貼咗唔少忌廉哥嘅舊相懷念佢。
「永活在我們心中」
「忌廉哥與忌廉家族」fb專頁噚日發文：「再見了，我們親愛的忌廉……忌廉今日開心的去到彩虹橋。」又話忌廉哥離開只係喺另一國度去守護大家，訃聞話「忌廉家族」會延續忌廉哥嘅使命，繼續宣揚正能量，相信「忌廉你永遠都會活在我們心中，讓這份愛可以繼續延續下去，願你一路好走」。
英國短毛貓忌廉哥約一歲時被棄養，由尖東信和便利店東主小高收留。小高最初將忌廉哥放喺店內趕老鼠，隨後坐正做「店長」，每日喺店內打盹。忌廉哥最初憑萌樣和圓潤身形俘虜附近上班的OL，玉照漸漸在fb流傳，貓氣急升。2012年7月，忌廉哥突然失蹤25日，引發逾9萬人關注佢fb專頁，失蹤新聞更登上幾份報紙頭版，最後忌廉哥喺附近一個停車場被尋回，貓氣一發不可收拾。忌廉哥成名後，便利店人氣更盛，更吸引名人爭相合照，惜信和便利店不敵貴租，至2016年結業。忌廉哥最後一日做店長，仲吸引數以千計粉絲從早到晚逼喺店外同佢影相，其後忌廉哥久休復出，去油麻地擔任新店嘅榮譽店長。
李八方
