上周六晚韓職「升班馬」FC光州作客尚州尚武嘅賽事尾段，後備入替嘅客軍前鋒金孝基，喺禁區一次攻門嗰陣同出迎嘅尚州尚武門將黃秉根相撞，金孝基嘅頭部俾黃秉根個膝頭「鋤」中。由於衝力太猛，金孝基喺草地轉咗一個圈先停低，仲要失去意識咁暈咗。球證馬上畀醫護人員入場為佢治理，其他球員都好緊張咁圍住金孝基，隨後佢需要送院治療。韓職官方Twitter同FC光州嘅社交媒體，隨後都更新金孝基嘅狀況，話佢喺送院途中已經恢復知覺，傷勢亦比預期嘅輕，總算不幸中之大幸。呢場賽事因為金孝基受傷而補時九分鐘，但係FC光州最後都要輸到第三場波，目前排喺韓職包尾嘅第12位。