失驚無神來了一個「香港國安法」，由人大常委會提出，人大代表大會自不然會在今個星期舉手通過。該消息首先在5月21日晚上傳出，由新聞網站香港01搶先報導，於是恒指夜期立即應聲下跌，次日5月22日香港股市一開市就大跌，愈跌愈有，全日只係午飯後有少許反彈，但力度甚微，全日最多跌1401點，收市跌1350點，成交額高達1805億元，近期少見；跌幅有5.56％，更是五年來最大。股市對國安法反應如此差，自然係代表投資者恐懼一國兩制消失，京官治港，大家散定水先。睇吓地產股跌得好勁，建制派嘅新世界跌9.8％，領展只係收租嘅啫，跌10.1％，新鴻基跌7.74％，可能係預兆移民潮再起，樓價會跌，地產股首當其衝。
國安法由香港01首先爆料，並不稀奇。01老闆于品海係建制派大將，素來與官二代、紅二代有密切關係，于老闆依家嘅市場策略好靈活，01網站有大量網紅、模特兒、歌星明星嘅「大派福利」肉感性感圖片，非常吸睛，呢啲手法，黨媒係做唔出嘅，由建制派大將嘅網媒出手，搶奪其他新聞網站嘅眼球份額，就有一箭雙鵰之效。
國安法詳情有七項主要內容，第四條最攞命：「明確規定香港應當建立健全維護國家安全的機構和執行機制，中央人民政府維護國家安全的有關機關根據需要在香港設立機構」。講白啲就係中國情報組織，公安部以至武警，必要時都可在香港設立辦事處，就地執行國安法，以後肖建華之類唔需要在「北望樓」漏夜失蹤，銅鑼灣書店林榮基之類唔使用甚麼「強力部門」送返大陸，中國公安人員直情可以光天白日之下上門拉人返大陸，唔使勞煩香港警察。拉咗上去，自然冇香港律師可以去保釋，最通俗啲講，就係「洗頭艇合法化」，問你驚未！
國安法之議一宣佈，股市就出現大量走資，此乃常理之內。但建制精英中環人就仍然掛住識事務為俊傑喎。一位朋友留言：「×先生夠醒目，今天已第一個登報支持人大推香港國安法，下星期開始會有各個愛國團體登報聲明支持，諸友或可考慮登報支持。超前部署一下留港的餘生。」發達L發表卓見話：「越早公開捍衞，擁護支持越有着數！」呢班精英人人都有外國護照，搵銀第一！想深一層，此乃中國之優質傳統文化（自袁國勇之後，冇人敢講劣質咯）教落那個當皇帝，照樣納糧，最緊要係抄別人家，唔關我事！中國人崇拜帝制皇朝，五千年不變，若敢質疑，則被視為外國勢力唆擺矣！