成為世界盃冠軍相信係每位球員嘅夢想，但近日拍賣網站Juliens Auctions中竟然出現咗一面2018年俄羅斯世界盃冠軍嘅金牌，最終更以71,875美元（約55萬港元）嘅拍賣價成交。有網民就講笑咁話，買家會唔會就係俾法國國家隊列入黑名單嘅皇家馬德里前鋒賓施馬？據嗰個拍賣網站嘅Twitter所講，上周四舉辦嘅「Sports Legends」網上拍賣會中，除咗有前湖人名宿拜恩（Kobe Bryant）嘅06/07球季24號球衣、02年世界盃嘅決賽用波、1998年巴西前鋒朗拿度着過嘅波砵之外，仲有前年世界盃冠軍金牌一面。官方話呢面金牌係來自當年法國隊嘅其中一名冠軍成員，雖然未知係邊個，但絕對貨真價實，經過10次叫價就成交咗，仲破埋呢次拍賣嘅最高紀錄㖭。