提起「屠海鳴」呢個名，八方相信無乜香港人知佢係乜水？但相信呢位全國政協委員噚日喺人民大會堂發言後，一定聲名大噪，皆因佢對黨對國嘅肉麻度，真係唔聽唔知時運高。
聲稱被起底恫嚇
本身為香港新時代發展智庫主席兼豪都國際董事長嘅屠海鳴，難得有機會喺政協會議發言，自然要「盡地一煲」示忠，席間談及自己過去一直以港區全國政協身份參與「輿論戰」，曾寫過230幾篇文章，喺《大公報》等香港「主流媒體」刊登，「與反中亂港勢力進行堅決鬥爭」，更稱「用筆為刀」，同「亂港」勢力堅決鬥爭之時，「恐怖主義陰雲」亦出現喺佢頭上，聲稱反對派不斷威脅佢，令佢同家人嘅各種資料被起底同網上傳播，佢亦不斷收到恐嚇、騷擾電話，甚至有人上門恫嚇，「可我不怕，因為在我的背後是我們的北京，是偉大的祖國！」
八方唔知呢種咁肉麻嘅「愛國」文章，有冇感召更多人同佢一齊建構「中國夢」？只知佢撐惡法撐到底，同時叫全國人大常委會充份行使釋法權同監督權，就《基本法》23條作出明確指引、督促落實，亦建議中央政府按《基本法》規定，督促香港特區政府切實履行職責，推動國民教育工作，落實落細落地……應該冇講少個「獄」字啩。